Prins PAKI y Pancho PAYA di Filomena College MAVO a ser corona

ORANJESTAD (AAN): Rondona pa nan compañero- y maestronan di Filomena College MAVO na San Nicolas,

e duo Zayron Geerman y Jaydrick Panneflek a keda corona como e Prins y Pancho nobo pa nan scol.

   Tabata directorado Joraine Oduber y Gislene Semerel cu a haci acto di coronacion. E MC tabata meneer Addonsito.

   Prins PAKI, Zayron Geerman (15) y Pancho PAYA, Jaydrick Panneflek (16) di klas 3B, lo ta participando dia 14 di november proximo den e eleccion di Prins cu Pancho Hubenil di Aruba pa Carnaval 73 den 2027. Nos ta orguyoso di e curashi y talento cu e hobennan ‘ki tin pa representa e scol di talento na San Nicolas, Filomena College Mavo, otro luna.

   PAKI & PAYA nan mesun palabra: “Nos ta gradici Filomena College MAVO y Dushi Carnaval Group, pa laga nos representa nan.  Danki na tur cu ta confia nos y apoya nos. Nos coachenan, tur meneer, juffrouw, nos amigo- y amiganan: Danki p’e sosten.

   Wanta duro tur hende!  Prins Paki y Pancho Paya lo bin mas cuerte cu un ola di tsunami.  E potretnan for di Filomena College pa cortesia Bryson Media.