Parlamentario Muzaninn Wever di Futuro:
ORANJESTAD (AAN) Siguiendo riba e tema di Enseñanza, parlamentario Muzaninn Wever, fraccion Futuro, a menciona cu riba e veld di enseñanza nan ta topa cu hopi stakeholders y den pasado no tur stakeholder a wordo envolvi den e tipo di decisionnan cu ta wordo tuma.
Por ehemplo, ora haya un rapport no por wordo ehecuta pasobra parti di e veld no tabata di acuerdo, of no por carga esaki. No tin cu bay reinventa e wiel, pero mester uza si, cierto informacionnan di e rapportnan cu tin, pero bin cu un discusion nacional, pues, no bin cu discusionnan manera “tras di porta” pasobra e ora ey bo no ta bay yega leu, Muzaninn Wever a señala.
“Bo mester, hunto cu bo docentenan, mayornan y hasta cu e alumnonan na scol, wak kico ta funcionando pa nan y kico no ta funcionando pa nan.
Bin cu mercado laboral; kico mercado laboral mester di nos enseñanza. Ki tipo di caracteristicanan nan ta verwacht di un trahado, mañan, na unda cu scol por produci e tipo di persona aki, e tipo di conocemento cu mester wordo aplica den e mercado laboral”, e dama parlamentario a señala.
El a agrega cu na final di dia e enseñanza mester por duna e mercado, e productividad y e conocemento cu e muchanan aki ta bin cu ne.
“Dus, mester tin un miho coordinacion hunto cu Minister di Economia y Minister di Enseñanza pa por trece e dosnan aki hunto, anto diseña bo curriculum, den tal forma cu nos ta ofreciendo e mercado laboral e experticionan cu e mester, sea di nivel di vocacion of tambe, sea mañan, di avanza”, Muzaninn a acentua.
El a sigui splica cu, como pais, nos mester wak tambe unda nos kier bay cu nos economia. “Pasobra nos economia, manera nos tur sa, nos unico pilar economico actualmente ta, servicio, hotel. Y obviamente den hotel tin diferente rango di e kadernan di servicio pero tambe bo tin otro kader, manager, ingeniero, abogado, pues diferente nivel, y tin biaha e informacion aki no ta yega cerca e studiantenan, y hopi biaha nan ta bisa cu nan no ta bay traha den hospitality”, Muzaninn a señala, agregando cu mester informa nan miho, y den cuadro di economia mes, mester bay amplia tambe e base. “Pasobra bo no por keda manda studiante afo pa nan bay studia HBO cu WO opleiding, anto ora cu nan caba, no tin trabao pa nan na Aruba, debi cu tur bo inversion den e hobennan aki, ta bay perdi”, Parlamentario Muzaninn Wever a relata.
