Hof ta rechasa deseonan di abogadonan den caso Diamante
ORANJESTAD (AAN): Ministerio Publico a emiti un comunicado di prensa indicando cu Corte Superior di Husticia a rechasa diamars tur peticion di abogadonan di e sospechoso Alan Howell pa “mas investigacion” den e caso penal conoci como ‘Diamante’.
Durante e tratamento den apelacion di 25 di maart ultimo, abogadonan di e sospechoso a pidi pa scucha varios testigo y pa agrega documentonan adicional na e dossier di e caso.
Corte Superior di Husticia a rechasa e peticionnan di e abogadonan debi na insuficiente hustificacion y insuficiente necesidad. Anteriormente Ministerio Publico a tuma e mes postura aki.
Cu e decision aki, e caso penal lo continua sin cu mas documento wordo agrega of cu mas testigo wordo scucha.
