Studiantenan di EPI a contribui cu trahamento di bak’i mata pa proyecto di Directie Ouderenzaken

Director di di EPI,  Anki Donker:

ORANJESTAD (AAN): Studiantenan di EPI a contribui den traha bakinan di mata pa e proyecto di Directie Ouderenzaken pa promeve bienestar di nos adultonan mayor. Director di EPI, señora Anki Donker a expresa cu no solamente e hobennan a haci esaki pa un cifra sino nan a contribui cu comunidad y haci algo bunita pa nos grandinan. 

“Esaki ta un experiencia special pa nos studiantenan pasobra nan ta wak con nan habilidad di loke nan ta siña na scol ta converti den practica mientras ta yuda comunidad, den e caso aki, nos grandinan”, señora Donker a remarca. 

El a menciona cu e proyecto aki tabata un colaboracion di Santa Rosa, EPI, Directie Ouderenzaken y casnan di cuido. “Esaki ta bira un momento special y mi ta haya hopi great cu dialuna mainta nos studiantenan a wak na kico nan a contribui na dje durante e actividad aki pa nos grandinan”, Donker a expresa. 

Tambe, el a señala cu proyectonan asina por contribui tambe pa ora e hobennan drenta mercado laboral, kendenan por sigui e direccion aki como ofishi pero tambe como un trabou part time pero sigur tambe nan por uza e habilidad aki pa contribui na comunidad. 

Segun Donker, un cooperacion asina aki, ta stimula e studiantenan pa haci nan habilidadnan bira realidad mientras nan ta studia y practica. Mas nan ta practica, mas nan ta crece den nan ofishi. 

“E cooperacionnan aki pa nos ta importante ora cu nos haya oportunidad pa mustra e habilidad di e studiantenan. Mas proyecto asina cu nan haya, mas e ta engrandece nan experiencia y tambe nan contribucion. Mas cu esey, nan ta haya oportunidad pa wak kico nan ta capas pa haci pafo di nan estudio”, señora Donker a expresa.