Studiante Jacob Scholten ta comparti su inspiracion pa un Aruba mas berde y mas autosufisiente

ORANJESTAD (AAN): Aruba ta den un punto crucial den su desaroyo. Den un mundo cu cambio climatico,

dependencia economico limita y un mercado local cu ta sinti presion di importacion, tin un generacion nobo cu ta lanta pa trece cambio.

Studiante Jacob Scholten, actualmente den su ultimo aña di estudio Innovatief Plantenteelt na Van Hall Laurenstijn Hogeschool na Leeuwarden, Hulanda, ta comparti su inspiracion pa un Aruba mas berde y mas autosufisiente. Su pasion ta conecta cu e plan ambicioso pa reforestacion den nos isla. Segun Scholten, por combina biodiversidad cu agricultura pa crea un pilar economico nobo, cual lo no solamente trece bida bek den nos naturalesa, pero tambe stimula un desaroyo economico mas stabiel y sostenibel.

Aruba ta importa mayoria producto for di exterior. Cultivando nos propio fruta y berdura, na escala comercial, por reduci prijs local y duna un oportunidad pa crecemento economico. Scholten a pone enfasis riba vertical farming, un metodo moderno pa uza espacionan limita di manera mas eficiente. Den un espacio cu clima controla, por cultiva productonan cu normalmente no ta crece den nos clima tropical. E uso di greenhouse y hightech farming lo habri un mundo nobo pa Aruba su autosuficiencia alimentario.

Scholten a confirma cu e ta cla pa bolbe Aruba despues di su estudio pa contribui cu e desaroyo di e pilar economico nobo cu ta agricultura comercial inovativo.

Na mesun direccion, Garlon Hasham, docente di informatica na Groningen y mentor pa studiantenan Arubano na Hulanda, ta subraya cu e cambio mester cuminsa for di educacion. Hasham a enfatisa cu nos sistema educativo ta data di temponan bieuw y no ta prepara nos hubentud pa e retonan di mañan.

Mester inclui informatica, sostenibilidad y entrepreneurship como parti central di nos curiculo di skol basico. Nos hubentud mester desaroya 'computacional thinking', peer reviewing y habilidadnan digital, combina cu un comprension di nos sistema ecologico. Esaki lo duna nan e base pa bira profesionalnan cu por guia Aruba pa un futuro sostenibel.

E mensahe ta cla; Aruba mester inverti den educacion, naturalesa y inovacion pa asina crea un pais autosufisiente, sostenibel y prospero.