Comision 11 ta haya esaki raro
ORANJESTAD (AAN): Manera por a lesa na numeroso ocasion den DIARIO, e grupo di miembronan sindical cu ta yama nan mes ‘Comision 11’ a gana e Caso den Corte pa ricibi e registro di miembronan di CAPA.
E veredicto ta bisa: “...draagt CAPA op om aan Wolff c.s., voor hun rekening een afschrift of uitreksel van het ledenregister van CAPA te verstrekken, waarin in ieder geval adressen “dan wel” e-mailadressen van de leden zijn opgenomen...”
Nos bay busca e registro y bam, e trahador di CAPA kier duna nos un lista di miembronan solamente cu adres. Nada mas! Nos a rechasa esaki.
Pakico: Pa Comision 11, e email-adresnan ta mas importante y den CAPA esaki ta ser uza normalmente awor. Hasta den e cambio di statutonan nobo cu e directiva aki a presenta ta poni pa uza e-mail. Den e tratamento den corte durante e caso aki esaki tambe a ser acentua.
Awor a nace un diferencia di e (sig)nificacion=interpretacion o splicacion entre nos di comision 11 y directiva di CAPA ariba e palabranan “dan wel”!
“Dan wel” tin dos (sig)nificacion. Prome e ta sinonimo di e palabra “of” tambe na hulandes por uza “dan wel” pa bisa deze keer =e biaha aki.
Pues "dan wel" ta indica cu por uza un escogencia entre dos opcion.
Comision 11 a manda un carta Amplio pa splica e diferencia di opinion di nos=comision 11 y directiva di CAPA, pa asina nos den CAPA por yega na un entendimento. Alfin, alcabo, miembronan di Comision 11 ta miembronan di CAPA.
Nengamento pa duna Comision 11 e email-adresnan ta un acto di mala fe, pa haci e trabao di Comision 11 mas dificil. Pa haci uzo di Postkantoor, tarda simannan y lunanan, ta costa hopi placa, etc.. Mientras e email-adresnan ta poni den e veredicto.
Carta di Duijneveld na Comision 11: E hurista Sr Duijneveld ta contesta Comision 11, cu e ta skirbi e carta aki den nomber di directiva di CAPA, ya cu CAPA ta su cliente. Den e carta aki, claramente Duijneveld ta pretende di a bira un Hues, esaki despues cu nan a sak’e for di Abogacia pa motibo di su accionnan, cualnan no por a mira luz di dia.
Duijneveld ta bisa: Su cliente CAPA ta dispuesto pa cumpli cu e veredicto di Juez. Comision 11 por bini cu otro splicacionnan o pretende di añadi, pero no ta cambia e posicion di su cliente. E veredicto ta claro. Pero Duijneveld, no kier lesa, ni duna balor na e parti di e veredicto: “dan wel e-mailadressen van de leden zijn opgenomen”.
Su decision ta cu Comision 11 por traha un cita, paga e gastonan y por busca e registro, nombernan cu adresnan, nada mas.
Segun Duijneveld, su cliente CAPA no ta bay reacciona mas o perde tempo cu informacionnan ariba e caso aki.
Wel wel, awor ta Duijneveld, manera un Hues di un Corte Canguro, ta dicta na su forma y bisa cu su cliente, Directiva di CAPA, no ta bay perde tempo mas cu informacionnan di miembronan di CAPA =Comision 11.
Wak e poder cu e persona aki tin, of a ricibi di directiva di CAPA! Awor ta Duineveld ta dicidi tur cos pa directiva di CAPA, ta bon pa tur hende, lesadornan cu lesa e comunicado aki, nan mes por conclui e nivel di e miembronan di directiva di CAPA.
Nan ta bon prepara pero no ta comprende e materia; Nan ta sabi, pero ta Duijneveld ta dicidi tur cos pa nan; Nan no ta worry, nan ta desfuncional, pero Capa tin hopi placa pa paga otro hende pa haci e trabao pa nam; Nan no ta prepara pa ta lider, pa no bisa “BOBO”, kendenan no por scirbi un carta, ni discuti pa yega na un entendimento cu un grupo di miembronan di CAPA. Pues pensa pa bo mes!!
Ta bon pa informa e miembronan di CAPA cu pronto tin un grupo di lidernan prepara cu bon estudio academico y kendenan ya a wordo eligi democraticamente pa tuma over dirigencia di CAPA. Banco Central mester duna aprobacion. Pues CAPA tin futuro.
Comision 11 a pasa den un caminda di cruz: Nos di Comision 11 simpelmente kier e registro pa nos por haya 20% di miembronan di CAPA pa yama reunion pa ricibi informacion concreto, con e Ladronicia di 382.000 Florin a sosode. Ta bon pa wak e caminda di Cruz cu comision 11 mester a pasa aden te awe. Na 2024 nos a perde lunanan pa busca informacion di directiva, sin resultado.
Nos a pidi directiva un reunion pa duna splicacion. No a ricibi un contesta; Nos a perde 13 luna den corte pero alfin, alcabo, a logra gana e caso pa ricibi e registro; Nos a perde dos luna, ya cu Duijneveld, den nomber di directiva di CAPA a bisa comision 11 via carta cu CAPA a apela e caso, locual a resulta un gañamento; Nos a logra di ricibi e prueba, pagando un suma, cu CAPA no a apela e caso, pero directiva di CAPA ta sigui bisa cu nan a apela e caso.
Despues cu nos a mustra CAPA e prueba cu CAPA no a apela e caso y cu nan ta desfuncional y incompetente, pasobra nan no sa kico nan consehero huridico ta haci, por fin nos por ricibi e registro, pero e registro a resulta no-completo; Awor Duijneveld ta hunga pa Juez pa hala directiva di CAPA un banda y tranca cos.
Final: Pa tur hende cu por pensa o popularmente bisa, hende cu dosplaca di tino, ta bisto cu aki tras tin cosnan scondi den e Ladronicia di 382.000 Florin. Manera nos a splica na varios ocacion. Time is on our side, yes it is.
Nos tin tur tempo, nos ta sigui lucha y persisti pa logra e berdadnan, cu awe ta scondi.
