Errol de Freitas cu bista positivo
ORANJESTAD (AAN): Errol de Freitas, kende ta president di San Nicolas Business Association (SNBA), ta mustra di ta optimista un tiki pa cu e futuro di San Nicolas.
El a bisa cu pronto nan tin un Cumbre cu ta bay tuma lugar, yama “The 3rd San Nicolas Business Summit”, y e tin confiansa cu esey lo bay bolter tur cos. E fecha original ta 19 di Augustus 2026, aunke kizas e lo pasa pa otro fecha cu ta 9 di September 2026.
“E biento lo bay supla na otro manera pasobra e Cumbre lo tuma luga,” De Freitas a bisa. “No solamente e necesidad, pero mi ta haya obligacion di e politico, di e gobierno pa nan ta presente den e Cumbre pa nan scucha e ocho pa nuebe inversionistanan cu ya a cumpra edificio, cu ya tin nan idea di negoshi.”
El a agrega mesora: “Pero e problema ta, cu si e politiconan nan no ta envolvi, kico ta e responsabilidad di Gobierno? Aki ta papia di Infrastructura y Permisologia.”
Segun e president di SNBA, na Februari caba el a sinta cu Ministro di Infrastructura, y e ta purbando di tur forma pa haya contacto cu Ministro Rene Herdé, kende ta un persona cu e conoce pa hopi aña. Pero te ainda nada.
A base di tur esaki, De Freitas a indica cu e no sa kico mas pa bisa e momento aki, pero el a agrega cu esaki lo no ta bay ta su ultimo entrevista.
“Anto por ultimo, nos tin cu bay bek na Santana di Cacho. Secrets Hotel ta funcionando den tur e dolornan cu nan tin,” De Freitas a indica. Den weekend el a bay pasa un dia na lama na Rodgers Beach, y aki a bin mira hopi yerba di lama... Esaki ta yerba di lama cu bo no ta mira na Eagle Beach ni na Palm Beach. E kier sa di con San Nicolas no por haya atencion. “Mi kier pa Gobierno di Aruba splica mi, di con San Nicolas no por haya atencion.”
“Bo no tin cu gusta mi, of ami no tin cu gusta bo pa nos traha cu otro. Pero bo no ta kere cu mi ta bay ta e nice guy constant. Politico a wordo eligi no pa djis sirbi Playa so, of pa sirbi Noord so, bo tin di bin pariba tambe. Pasobra ta aki bo tin cu busca voto!
