Zulianne Faro:
ORANJESTAD (AAN): E siman aki, DIARIO a entrevista Zulianne Faro di Stichting Hunto, riba nan progreso pa cu e uzo di Mobil Trailer, y tambe e comportacion di clientenan y nan adelanto na Centro Colorado.
“Nos ta habri pa e ayudo cu whatever e persona ta desea di yuda. Por ehempel, nos ta bay riba caya, nos ta uza paña, nos ta uza sapato,” el a declara.
Claro cu tur esaki costa placa pa un fundacion, y e ta mustra cu si acaso tin hende of instancia, y compania cu ta balora nan trabao, y cu nan kier haci donation, tur esey ta bon bini.
“Pasobra e ta algo cu tur dia nos ta ofrece y ta yega un momento cu bo stock ta baha. Aki den nos tin personanan cu ta den Colorado y kendenan no tin famia, pues nan mester un compras chikito, algo simpel, manera corn flakes, un bleki di lechi, algo djis pa nan cuminsa,” Faro a declara.
Pa entrega donacion, bo por djis yega na porta di Stichting Hunto, y nan lo tuma esaki cu mil amor. Pues loke sea cu bo curason ta duna pa yuda. “Nos semper ta habri pa tuma esaki,” Zulianne Faro a finaliza bisando.
