Setar y Universidad di Aruba ta colabora pa un futuro mas sostenibel

ORANJESTAD (AAN):  E compania Setar NV ta contento di a colabora cu e facultad di Hospitality and Tourism Management Studies (FHTMS) di

Universidad di Aruba den cuadro di e minor Destinations in Transition, un programa cu ta wordo ofreci den colaboracion cu NHL Stenden University of Applied Sciences.

   E colaboracion aki tabata enfoca riba intercambio di conocemento y ideanan innovativo, brindando e studiantenan oportunidad pa traha riba retonan practico relaciona cu sostenibilidad y desaroyo tecnologico. E programa a inicia na september, unda cu e studiantenan a bishita Setar, pa cera conoci cu nos compania y tambe cu e dos temanan di investigacion.

  Durante e programa, tres grupo di studiante a enfoca riba Waste Management and Sustainability Footprint at Setar, explorando posibilidadnan relaciona cu maneho di desperdicio, e-waste, na Setar. E otro tres gruponan a enfoca riba Digital Services & IoT as Enablers of Sustainable Tourism at Setar, explorando e rol cu servicio digital y tecnologia di Internet of Things (IoT) por hunga den e desaroyo di turismo sostenibel na Aruba.

   E siman cu a pasa, e studiantenan a presenta e resultadonan final di nan proyecto na Setar. Durante e presentacionnan, nan a comparti nan ideanan como tambe nan recomendacionnan.

   Pa Setar NV, e colaboracion cu Universidad di Aruba ta representa un oportunidad valioso pa conecta cu educacion y pa stimula intercambio di conocemento riba temanan actual manera sostenibilidad, innovacion y tecnologia.

Nos ta gradici e studiantenan pa nan dedicacion y contribucion durante e programa y Universidad di Aruba pa e oportunidad pa traha hunto riba e iniciativa aki.