Prome Minister Mike Eman a ricibi tesis di doctorado di Monica Espinoza Cangahuala

ORANJESTAD (AAN): Prome Minister di Aruba, Mike Eman, a ricibi un buki di e tesis di doctorado di dr. Monica K. Espinoza Cangahuala,

kende a obtene su titulo di doctor den fisica (natuurkunde) na Rijksuniversiteit Groningen dia 22 di september 2026.

   Monica naci na Lima, Peru a crece na Aruba for di edad di cinco aña, a studia na Colegio Arubano y podespues a sigui studia na facultudad di ley na Universidad di Aruba, prome cu el a continua su estudionan na Groningen. E ta e prome muhe den su famia cu a obtene un doctorado. Su investigacion ta enfoca riba con e moleculanan por organiza nan mes den e structuranan chikito pa captura y transporta luz, inspira pa e manera cu mata ta uza luz di solo durante fotosintesis.

   E conocemento aki por contribui na desaroyo di material nobo pa uzo den futuro cel solar. Un aspecto special di su tesis ta cu e ta contene un resumen na Papiamento. Pa Monica, ta importante pa nos lengua materno tambe haya su luga den mundo di ciencia y investigacion academico.

   Actualmente, Monica ta traha como Data Scientist na Hulanda y ta colabora cu Universidad di Aruba den un proyecto relaciona cu geospatial data science. E logro academico di Monica ta un ehempel di e talento cu Aruba ta produci y di e contribucion cu profesionalnan cu a crece riba nos isla por aporta na desaroyo di ciencia internacional. Na Den Haag recientemente Prome Minister Eman a felicita Monica cu e titulo di doctor.