Cambio climatologico y y di energia lo afecta turismo tambe
*Proceso natural ta adapta un producto na exigencia di tempo
*Maneho presenta pa Gobierno ta garantisa stabilidad economico
ORANJESTAD (AAN) — Den e informacionnan cu Gobierno Wever-Croes a presenta na Aruba e siman aki, el a confirma un maneho cauteloso di turismo, cu mester conoce un maximo.
Na varios ocasion, DIARIO a atende cu e tema di crecemento turistico, cu ta exigi un responsabilidad gubernamental enorme debi sigur na su vulnerabilidad pero tambe na su exigencianan, cu mester evita cu turismo ta destrui su mes.
Pa un pais conoce un economia cu ta basa riba turismo, e mester ta un pais cu por duna e servicionan cu esaki ta encera na forma optimal y no mester mira solamente e atraccionnan cu e tin pa entrega e turista.
Sector turistico mundial, ta entrega diferente prueba di e peliger di turismo pa destrui su mes, pa falta di planificacion debido y sigur pa controla e ansia pa crece y sigui crece, sin introduci un maximo responsabel.
Turismo ta exigi vigilancia continuo riba un cantidad di tereno, hustamente pasobra e ta vulnerabel y mester wordo compara como un mata bunita, cu pa su buniteza y atraccion, mester di cuido y proteccion.
Den esaki mester atende cu loke naturalesa ta entrega na un pais como base pa e industria turistico, pero na e capacidad di turismo pa transforma un destinacion y deshaci hustamente loke a atrae e turista.
Na hopi ocasion nos a lanza e advertencia aki, cu ta wordo sostene pa problemanan serio cu destinacionnan di fama mundial, mester a duna prioridad pa por a sigui dilanti.
Tin hopi tipo di turismo, cu ta basa localmente riba e tipo di servicio cu un pais, region of ciudad, ta entrega.
Aruba tin e suerte cu e ta cualifica como un destinacion excelente pa e turista cu kier sinti su mes rey den loke naturaleza y cultura ta ofrece pero tambe como destinacion pa congreso y cuido medico di calidad entre otro.
Na mes momento, Aruba debi na su nivel halto di desaroyo, ta ofrece e turista un nivel di bida di e poblacion, cu sigur ta hunga un papel importante. E educacion internacional di poblacion di Aruba y e infrastructura basico di e comunidad cu un nivel halto di bida, ta entrega e turista un ambiente na un nivel Europeo na beach tropical.
Ademas di esaki, na Aruba condicionnan di tempo por ehempel, generalmente ta sumamente trankil.
Aruba ta aparece riba lista di paisnan cu situacion politico trankil y cu un grado halto di cuido medico cu coneccion internacional.
E peligro mas grandi pa Aruba ta, cu turismo ta bira enemigo di su mes y poco poco ta deshaci di e encanto cu actualmente e ta ofrece e turista, manera na hopi ocasion DIARIO a splica.
Pa Aruba atrae turista, e mester keda semper Aruba y ofrece e turista espacio, pa e por disfruta di Aruba.
Den e cuadro aki, e cantidad di hende cu ta biba na Aruba, mester tin un limite y mester sirbi economia, pero na mes momento no transforma Aruba den un centro di problema social, cu e pais no por atende.
Turismo ta un ramo bibo di un economia mundial bibo. Esaki ta nifica, cu e ta renoba su mes pa e por sigui existi.
Turismo bon guia, ta adapta su mes na exigencia di tempo pero den cuadro di reglanan cu no ta deshaci di e autenticidad di e producto Aruba, cu a atrae e prome turistanan cu a dicidi pa Aruba.
“No more hotels” ta e loke a bini dilanti den e pensamento cu sigur nos mester sostene.
Mester tene na consideracion tambe cu otro tipo di acomodacion tambe a haci nan entrada pa diversifica e base di turismo, a base di loke a bira expansion di turismo.
Sinembargo, mester proteha e calidad di turismo pa medio di mantencion di orden, seguridad y reglanan cu mester defende bienestar pero tambe e respet cu e turista mester ricibi como participante den creacion economico di e pais.
Un turista cu ta paga pa estadia na un hotel di e categoria mas halto, mester ricibi e trato como tal y e servicio pa cual e ta paga aunke ora e bolbe cas, e por ta den un situacion cu e no por cumpra keshi pa come cu su pan.
Aruba mester tene cuenta cu e cambio di clima y cambio den energia, cu lo exigi pa acomodacionnan presente na Aruba, ahusta nan infrastuctura na loke condicionnan di tempo y gasto di energia, ta exigi.
E gastonan di un turista lo conoce aumento continuo den e panorama mundial. Cu gasto, exigencia ta subi, loke lo bira necesidad pa inversion den acomodacionnan existente cu ta basa riba empresa priva cu ta parti di e economia mundial di cambio cu retonan cu ta reemplasa expansion como base di inversion!
