E exigencia di realidad mundial na entrada di un aña escolar nobo
*Produccion di mentalidad mundial actual ta dolor, morto y hamber
*E prome deber enfrente mucha a bira rehabilitacion di balor di hende
ORANJESTAD (AAN) — Un aña escolar nobo a habri. Portanan di school ta bira entrada di mucha inocente, cu ariba e ruta cu nan a encamina, ta traha ariba nan futuro.
Cual marca di zapato nan tin na nan pia? Esaki sin duda ta un preocupacion grandi na un momento cu situacion mundial ta bati alarma.
Den mundo civiliza, leynan ta sostene e berdad di hende, cu ta bay perdi den comunidadnan di hende, cu ta bende nan mes na forma demasiado barata si tene na consideracion e prijs real di hende, cu a wordo crea pa dirigi mundo.
Den e siman cu portanan di school a habri atrobe, un parti grandi di mundo ta wordo destrui y ta destrui hende cu a perde tur su valor, den gueranan sin piedad y sin misericordia, cu ta wordo destrui pa e importancia cu hende ta duna na posicionnan den cual e por eleva su mes pa sinta na e mihor posicionnan cu sociedad tin pa ofrece.
Na inicio di aña escolar nobo e preocupacion mas grandi sigur den periodismo cu mester bati alarma den un mundo cu a perde rumbo, mester ta e preparacion real di un mucha pa e por crece como ser humano cu e pakete di valornan cu ta distingui hende como hende.
Felicidad di hende ta nifica cu e hende por sinti su mes bon cu e calidad di bida cu e ta construi pa asina bira parti activo di un comunidad, den cual e ta ocupa e lugar cu segun su deseo y capacidad, e por funciona y sirbi como hende.
Pa cada persona e pakete di felicidad ta diferente. Ta hustamente esaki ta e fundeshi di un comunidad, cu ta uni calidad, capacidad y talento individual positivo di cada hende, den e mecanismo di interaccion humano.
Si nos mira atras den historia nos por topa e resultadonan di e realidad aki, cu a crea momentonan di construccion y logronan enorme pa e ser humano pero tambe momentonan di destruccion total pa e mundo cu hende ta habita.
Pa un hende por ta honesto cu su mes, e no mester depende di e loke otro ta spera di su persona pa e por participa den comunidad nacional of mundial ni loke otronan kier alcansa a base di su esfuerzonan cu ta wordo maltrata y silencia na forma bunita den un sistema di democracia falsifica.
Awe mundo conoce momentonan di horor. No tin trankilidad na un mundo, cu a bira asina sabi cu e kier conkista tur planeta, pasobra hasta mundo mes a bira demasiado chikito.
Awe historia ta bati alarma pa e hende moderno cu den pasado remoto, cu awe den buki na school ta wordo presenta como temponan antiguo, a conoce comunidad di hende mucho mas avanza cu loke awe hende ta pretende di ta.
Civilisacionnan poderoso den historia di mundo, a destrui nan mes den e arogancia cu awe ta presenta na mundo, cu ta transforma produccion mundial den miseria, dolor y angustia manera gastonan di gobernacionnan ta demostra.
E suma di placa cu hasta paisnan democratico mester gasta na guera of artefactonan pa gobernantenan por crece cu placa di Pueblo, ta entrega e prueba cu hende atrobe ta busca miseria cu lo destrui e generacion nobo.
Dolor di mucha ta dolor di futuro cu ta spera mundo. E mucha di awe cu ta sclama pa alimento mientras armanan potente cu ta costa capitalnan, ta destrui porvenir si e mucha mes keda bibo.
No solamente na zonanan directo di guera, muchanan ta yora. E mentalidad mundial nobo cu un hende mester sinti su mes poderoso, sin tuma na consideracion si esaki ta bon of mal logra, ta destructivo pasobra e ta abusa di hende pa por logra loke e tin na bista pa su propio beneficio, cu e ta dorna cu mentira.
Un aña escolar nobo a cuminsa. Kico ta entrega muchanan? Mas sabiduria con leo por yega den bida, sigur si e sabi con elimina tur loke ta den caminda, cu segun filosofia ta calidad di animal, cu ta mata pa e come, pa e crea su teritorio hasta si e mester kibra neishi di otro.
Un aña escolar nobo a cuminsa. Imagennan di mucha tur caminda cu ta acudi na school pa prepara nan mes pa un futuro, cu mundo awe ta entrega nan den forma di sanger y destruccion di bida inocente y ta simbolo di e comunidad mundial, cu no tin placa pa inverti den progreso di hende pasobra rond mundo placa mester wordo gasta na mas y mihor guera destructivo di bida, di futuro, di tur loke ta basico pa e ser humano.
Den e proceso aki tambe respet ta bay perdi. Respet cu hamas por cana man den man cu logronan cu solamente ta bira posibel ora hende bira animal y ta destrui otro pa e por come, pa e por crece aunke e mester laba su man den sanger di hende!
Schoolnan a habri nan porta. Awe mas cu nunca mester uni sabiduria di buki y loke concenshi humano ta dicta, pa e mucha por sigui cana den direccion di un futuro, cu no ta uni progreso propio na destruccion di otro!
