Janely Nicolaas a bira directora
ORANJESTAD (AAN): Despues di 17 aña na Club Kibrahacha, ultimo den funcion di Director, Jeffrey Matos a tuma un reto nobo na Hulanda. Den su añanan na Club Kibrahacha Jeffrey, hunto cu e trahadornan y voluntarionan, a duna un tremendo aporte y guia na crecemento y diferente cambio positivo na nos club.
Centro Kibrahacha ta un lugar di sosten, ambiente y actividad pa e miembronan, cu sosten di famia, tur boluntario y trahadornan.
Ultimo aña Club Kibrahacha a delinea un plan strategico pa asina por alinea e programa na e necesidad di miembronan y communidad pa cu e añanan dilanti. Un plan cu a cuminsa haya forma guiá door di Directiva, y sosteni door di trahador- y boluntarionan. Como Raad van Toezicht e ta duna man un placer enorme pa wak con trahador- y boluntarionan a bin hunto dia aden, dia afor, pa duna aporte pa asina e
grandinan tin un lugar caluroso pa por pasa oranan hunto.
Pa yena e funcion di director, Raad van Toezicht, a encamina un proceso di solicitud. A saca un vacatura interno y externo pa despues di un seleccion inicial sigui den conversacion cu diferente solicitante. Na final di e proceso di solicitud Raad van Toezicht a designa sra. Janely Nicolaas como director di Club Kibrahacha entrante 1 di September 2025.
Sra. Nicolaas ta yiu di tera y ultimo 14 ana a biba, studia y traha na Hulanda. Sra. Nicolaas ta trece cune
experencia amplio den sector social y di cuido, den funcion di ehecucion y maneho.
Como miembro nobo di e team di Club Kibrahacha nos ta sigur cu sra. Nicolaas lo wordo ricibi den un manera caluroso pa un y tur cu ta forma parti di nos Centro. Y cu e lo ricibi apoyo y sosten di tur empleado, voluntario y famia di Centro pa conoce tur loke ta encera e dia a dia di Centro pa asina e tambe por ta un sosten y apoyo pa den su funcion nobo.
Nan tur ta desea sra. Nicolaas tur clase di exito den su funcion nobo.
