Errol de Freitas, Presidente di SNBA:
*E impuesto aki ta chocando pueblo!
ORANJESTAD (AAN)—Presidente di San Nicolas Business Association (SNBA) señor Errol de Freitas, den entrevista cu DIARIO, ademas di tur e posibilidadnan cu Aruba tin, relaciona cu e rikeza cu e tin den mineral pa wordo explora y explota, den su subsuelo, e ta papia tambe di un refineria modular, cu un capacidad di 150 mil bari, y kizas hasta di 600 mil bari.
“Esey mester ta un realidad, e ta kita e presion riba nos economia”, De Freitas a subraya. El a agrega cu nan ta pidi gobierno pa sinta cu SNBA pa trata e BBO na frontera. E BBO riba frontera ta chocando e pueblo. Pakico esey ta pasando? Mi ta scucha hende papiando di surplus, pero bo no por tin un surplus si bo ta primi e zapato di pueblo. Nos ta papiando di Rijkswet y di yen di cos. E prome cos cu nos tin cu haci ta streamline nos finanzas. Anto mi ta mirando constantemente cu Minister Geoffrey Wever cu e ta trahando riba e aspecto aki, y e tin contacto regular cu nos, anto solamente pa e hecho cu bo tin contacto bo tin informacion”, segun Errol de Freitas a indica.
Finalmente, el a bisa cu Aruba ta drentando un caminda crucial pa Aruba, nan kier partner cu gobierno, nan no ta para critica ningun gobierno, pero no solamente SNBA kier gobierno su atencion sino su accion.
