ORANJESTAD (AAN): Bon noticia pa farandula local! DIARIO a haya sa di un musico Arubano kende ta conoci pa produccionnan riba nivel local y internacional ta den preparacion
pa su siguiente album na e momentonan aki. Den e proyecto aki ta formando parti Producer y Musiconan di Colombia, Mexico y Venezuela.
Ruelle a cuminsa su trayectoria musical di hoben, unda el a siña toca diferente instrumentonan. El a join bandanan local na hoben y a toca drums pa diferente banda te na 2010, unda el a cuminsa produci ritmonan y cancionnan riba su mes.
E tambe ta forma parti di organizacionnan cu a trece artistanan grandi internacional na Aruba, como e persona di contacto pa cu e artistanan aki durante e temporada ey.
Aña 2013 tabata su ultimo lansamento internacional y Ruelle a ricibi premio di Artista Innovativo di Aña pa su album cu a worde saca riba plataformanan digital manera, iTunes, Amazon.com, Spotify y tambe ariba diferente rednan di Telefon Mericano.
Den ultimo añanan el a presenta como DJ StickySoundz na diferente festivalnan na Aruba y internacionalmente.
Segun Ruelle a indica na DIARIO, si tur cos cana mane mester ta, pa fin di aña e album mester ta online. E nomber no ta conoci ainda pero sigur lo worde anuncia despues.
Fuera di ta un productor, Ruelle semper a yuda esnan cu tin aspiracion pa crece den musica y industria musical.
Di awor caba DIARIO ta desea Ruelle tur clase di exito.
