ORANJESTAD (AAN) – Director di SVb, Edwin Jacobs a elabora tocante e fondo di Cesantia den e periodo di pandemia di covid-19,
y el a splica cu aña pasa e proyeccion economico tabata di tal indole, cu hopi compania a bay haci un apelacion na e fondo di cesantia, pa motibo di ta den problema di pago pa e trahadornan, of nan a acudi na Corte pa bancarota.
“E realidad te cu aworaki no ta duna un indicacion cu locual nos a spera aña pasa ta pasando den nos economia. Desde e pandemia aña pasa, 82 trahado di tres compania a haya cesantia pasobra e compania no por a paga nan, y te cu Diahuebs mainta nuebe compania a haya cesantia pa nan trahadornan cu ta 56. Nos tin ainda pa bay procesa di cinco compania cu tin 24 trahado den servicio.
Nos ta mira tambe cu e fondo di cesantia, e impacto cu a premira aña pasa den e di tres y cuater cuartal no a sosode, locual ta un indicacion cu e economia ta atendiendo su mes na un mihor forma”, Ir. Jacobs a señala.
CONCLUSION:
Como conclusion, director di SVb Edwin Jacobs a bisa cu nan por premira cu e subsidio di salario ta bay ta bahando e proximo lunanan pero si ta bay keda tin necesidad di dje, y esey ta trece cune cu mester keda cumpli cu e condicionnan, manera Minister Maduro a trece dilanti.
El a reitera cu e companianan cu no ta di acuerdo cu e decision definitivo di loke nan a haya na subsidio di Augustus te October 2020 y tin obhecion por bay na esaki.
Jacobs a menciona cu tabata tin companianan cu a participa den otro programanan di suavizacion di belasting di Departamento di Impuesto, cu no a declara BBO. “Nan a asumi cu pasobra nan a participa den e programa no mester declara BBO y esey no ta e caso. Mester keda declara BBO bao tur circunstancia. Tambe companianan cu e ley ta haci un excepcion pa nan pa loke ta pago di BBO, apesar cu nan tin e excepcion ey, nan tin cu declara nan estado di cuenta. Eynan tin biaha nos ta wak cu tin problema pasobra departamento di impuesto no tin informacion y e ta nifica e ora ey cu no tin perdida di benta. Pesey, tuma bon nota di locual tin para den bo decision y si no ta di acuerdo cune, manda bo obhecion aden, y si tin cosnan pa soluciona cu impuesto, solucione y despues nos ta bolbe bo necesidad na subsidio di salario. Y si bo ta di acuerdo cu e decision tuma contacto cu departamento di invordering y yega na un acuerdo di pago suaviza pa loke bo a ricibi di mas na subsidio di salario”, Ir. Jacobs, director di SVb a bisa, finalmente.
