ORANJESTAD (AAN): Diaranzon e rapport anual di Corte Comun di Husticia a wordo presenta, unda cu vice presidente di corte Jacques Keltjens
a cuminza na splica cu e pandemia di COVID-19 tabata tin su consecuencianan tambe pa corte, unda cu Corte Comun y Corte di Aruba a mantene nan mes totalmente na e medidanan introduci pa Gobierno.
Keltjens a splica cu den e prome dos lunanan di e pandemia, April cu Mei, corte tabata permiti di ta habri como un organizacion cu un cantidad limita di empleado y door di esaki por a atende solamente cu e casonan di urgencia y casonan cu tabata yegando final di nan termino.
Hopi caso a wordo trata na un manera digital y afortunadamente prome cu e pandemia mes, Corte a cumpra hopi bon equiponan.
Asina mes no tabata facil pa trata casonan na un manera digital y esaki tin biaha a costa extra tempo.
E empleadonan di ICT a haci un tremendo trabao di mantene e comunicacion digital den bon funcion, segun e vice presidente di Corte.
El a splica cu asina mes algun caso a wordo retrasa, pero ultimo tempo a logra trata mas caso, door di e suavizacion di medida.
Corte a wordo prepara totalmente pa trata e casonan na un manera safe.
A introduci un sistema tambe unda cu abogadonan na un manera digital por a entrega nan casonan y pa prome biaha tabata asina cu e placanan di Griffie, por a wordo paga via banco.
“Asina nos a logra rescata un cantidad grandi di caso, pa caba tratamento di esakinan”, segun Keltjens.
El a indica cu despues di e pandemia lo sigui haci uso di varios di e metodonan cu a wordo introduci debi na e situacion.
Hof den e aña cu a pasa a duna bek e paisnan di Reino un suma di 18.6 miyon florin, relaciona cu e 12.6% di contribucion di solidaridad.
Tin 4 categoria di caso, esta di menos pisa te cu hopi pisa.
Keltjens a splica cu pa loke ta e casonan suave pa tur e islanan tabata tin un bahada den e cantidad na 2020, pero un aumento den casonan pisa.
Remarcable ta cu pa Aruba tabata tin menos caso pisa y specialmente un bahada enorme pa loke ta e casonan civil (‘bodemprocedures’).
Keltjes a splica si cu tabata tin un aumento di casonan laboral.
Unda cu na 2019 e total di caso tabata 165, na 2020 esaki a aumenta na Aruba pa 215 caso.
E vice presidente a splica cu mayoria di e casonan aki tabata relata na COVID-19.
