ORANJESTAD (AAN) – Un punto hopi importante cu a bin dilanti, den DIARIO su entrevista cu e colega Ricardo Jimenez, ta e pregunta: con el a contagia di covid-19?
“Ora cu DVG a puntra mi con mi ta kere cu mi a contagia, si mi a bay un fiesta, restaurant of algo social, mi a bisa nan cu enberdad no. Cu tanto trabao mi no tin tempo pa haci bida social.
“Durante e dianan di cuarentena mi a pensa hopi riba esey, y aunke mi no por asegura esaki 100% mi ta pensa cu mi a contagia ora mi a bay un supermercado. Di con? Pasobra, na prome lugar den hopi poco supermercado nan ta tuma temperatura na e cliente. Unico cu nan ta rekeri ta pa e persona uza tapaboca, y no tur ta uza e hand sanitizer.
“Tin hende cu ta bay supermercado sabiendo cu nan tin covid-19. Nan ta uza e tapaboca pa drenta, nan ta mishi cu e porta di entrada, nan ta pasa door di rekinan ta mishi cu e productonan, nan ta yega na unda tin fruta y berdura y ta mishi cu nan, ora nan bay paga na caha nan ta pone man riba e tombank y den masha poco supermercado chikito, vooral den bario, ta haci limpi unda cu nan sa cu e cliente ta pasa su man.
Incluso, ami ta pensa cu tin hende cu den cuarentena toch a sali bay supermercado despues cu DVG a bay controla.
“Mi tin cu bisa cu DVG ta bin controla tur dia unda cu tin hende registra como covid-19 positivo. Nan ta bin un dia pa controla y bo tin cu bay pafo pa nan wak cu bo ta den bo cas, pero nan no por controla e 24 oranan pa dia.
Pesey, kizas mi ta kere cu na dado momento tur hende lo haya covid. Y mi ta kere cu lo mas sensato ta 1: tuma e vacuna y 2: Tene bo mes na e medidanan di proteccion contra covid-19, pasobra e covid ta un “ruleta ruso”. Por ta e pashent ta scapa, por ta no! Finalmente, mi ta sugeri e consumidornan cu tur producto cu bo cumpra den supermercado, hinca nan den un saco y ora di yega laba tur loke por wordo laba, y spuit productonan cu ta bin empaketa den saco, manera pan, aroz, etc. Y si ta posible uza handschoen prome cu drenta e negoshi y coi tur producto cu handschoen bisti”, Ricardo Jimenez a señala.
