ORANJESTAD (AAN): Un empresario di Aruba cu ta ocupa pa algun tempo caba ta produci y distribuyendo e producto conoci como “Aruba CBD” pa varios pais rond mundo, no por compronde con na su mesun isla natal keto bay porta ta cera pe.
John Arends ta hayando exito caba cu e producto di “Aruba CBD” produci y empaketa na Hulanda. Un total di 12 pais aworaki a duna aprobacion y luz berde pa “Aruba CBD” aki wordo importa na nan pais y bendi.
Esaki nifica cu “Aruba CBD” ta birando grandi, y ta aportando asina grandemente na salud di hende na varios pais.
Den un entrevista, John Arends a splica di berdad cu “Aruba CBD” ta grandi, y kier mustra kico tur e kier haci pa yuda Aruba economicamente.
Manera ta conoci, Aruba tambe ta desaroyando plannan pa por legaliza e uso di Cannabis medicinal. Gobierno di Aruba a haci un sondeo via un comision pa mira si tabatin interes pa desaroya (1) Medicinal CBD, (2) Medicinal Cannabis, y (3) Supplemental CBD.
Ora el a haya sa esey, John Arends tabatin hopi combersacion cu e Comision. Pero awor e comision no tey mas, pasobra nan meta tabata pa adapta y bin cu e leynan pa Aruba introduci nan. Raad van Advies a duna su OK, y a manda e leynan bek pa Ministro di Salubridad pa e leynan wordo ehecuta. Ta trata di Ley 82 pa Medicinal CBD, Ley 83 pa Medicinal Cannabis, y Ley 84 pa Supplemental CBD.
Pero pa sorpresa di hopi, incluyendo esnan di Comision, e “Hefe di Inspectie di Medicina” a duna conseho na Ministro pa elimina Ley 84, esta e “Supplemental CBD”. Siendo cu e Comision a mustra claramente pakico Supplemental CBD tin di wordo inclui.
Pues Aruba a duna OK pa Medicinal CBD y Medicinal Cannabis solamente. Ta parce cu awor Aruba a haci un eror grandi di laga Ley 84 sin wordo aproba.
Aki ta unda problemanan ta bay start! Segun Arends, e ta problema pasobra aworaki tur CBD cu ta wordo importa na Aruba actualmente ta drentando bao di capa di “Medicinal CBD”, siendo cu no ta corecto. “Den mi pensamento e ta fraudulento,” John Arends a bisa.
Pasobra si e Hefe di Inspectie di Medicina ta participa den esaki, su puesto ta core peligro, na opinion di Arends. Si tin un Inspectie der Volksgezondheid cu ta funcionando y cu kier importa Medicinal CBD, e ora nan tin di mustra nan ISO Certification. Pasobra bo mester di un otro tipo di ISO Certification. Ta prohibi pa importa algo bao di “Medicinal CBD” pero na final ta bende como “Supplemental CBD”.
John Arends a splica cu su producto “Aruba CBD” tin e ISO Certification como Supplemental CBD. Ademas el a agrega cu nan tin ISO Certification pa Medicinal CBD tambe, pero aworaki ta sigui produci Supplemental CBD. Motibo pa esey ta cu e productonan di Suplemento ta mas accesible na publico en general, como cu nan no ta asina caro. El a bisa cu Medicinal CBD ta como 10 biaha mas caro.
Na Merca por ehemplo, ta un solo Medicinal CBD tin aproba pa FDA, y esey ta “Epidiolex”. No tin otro Medicinal CBD na Merca.
Y awor esnan cu ta wordo bendi na Aruba importa di Merca y aparenta di ta ‘Medicinal CBD’? Djis bay check e registro di FDA na Merca, y lo bo descubri cu envez di “Medicinal CBD”, nan ta mas bien ‘Supplemental CBD’.
John Arends di Aruba CBD na Hulanda ta miembro desde 2018 di “Cannabis Trade Association”, y e grupo aki a hasta manda un carta di advertencia pa Gobierno di Aruba, si acaso nan cuminza importa e producto “Aruba CBD” na Aruba y pone bao categoria di “Medicinal CBD”, e consecuencia lo por ta desastrozo pa e compania cu sede na Hulanda.
