Reunion entre Ministerio di Turismo cu ATA y DOW encuanto proyectonan pa mehora Aruba

Minister Dangui Oduber ta considera esaki un exito

ORANJESTAD (AAN): Dialuna a habri cu un reunion interesante, cu ta bay impulsa e isla cu proyectonan pa mehora e producto!

   Minister di Turismo y Salud Publico Sr. Dangui Oduber a reuni cu Aruba Tourism Authority (ATA), cu Dienst Openbare Werken (DOW). Den e reunion aki e mandatario a papia riba tur e proyectonan cu ta bay tin den aña 2022.

   Palabracion concreto a worde haci entre ATA y DOW pa asina nan hunto por forma un “project groep”, cu na su turno lo ta encarga cu ehecucion di tur e proyecto nan pa mehoracion di nos product Aruba.

   Minister Oduber den pasado semper tabata tin un bon cooperacion entre Ministerio y DOW pa cu realisacionnan di proyectonan. A traha y finalisa proyectonan manera di embeyecimento di e area di Brickel Bay, proyecto Boardwalk Malmok, proyecto di Baby Beach fase 1,  just pa menciona algun.

   E reunion tabata uno hopi importante pa asina por delinea tur e proyectonan di aña 2022 cu ATA y DOW, di e manera aki tur partido ta riba e mesun linea di pensamento. Minister Dangui Oduber ta hopi optimista pa cu aña 2022 y DOW ta bay sigui brinda tur e cooperacion necesario pa realisa e proyectonan e aña aki.