Crisis Team ta bay reuni pa atende cu e tema
ORANJESTAD (AAN): Por a mira cu na varios pais di entre otro Latinoamerica, ya caba a cuminsa vacuna contra Covid-19, e muchanan menor di 12 aña.
Ta conoci cu na Aruba, e muchanan mayor di 12 aña (12+) a haya chens caba di wordo vacuna.
Kiermen, cu e grupo di mucha cu ta cay bao di e edad aki (5-11 aña), ainda no a wordo convoca pa haya nan vacuna. Pero mientrastanto, tin paisnan, manera Merca, cu e grupo aki ya a haya nan di dos dosis. E booster shot ta bay hay'e denter di 6 luna, esnan cu a haya nan dos prome dosis.
Mas y mas pais, incluso den Latinoamerica, manera Colombia, Costa Rica, entre otro a inicia caba e vacunacion pa e muchanan entre 5 y 11 aña.
Por corda cu aña pasa, den luna di Juli, e Centronan di Control y Prevencion di Malesanan (CDC) a considera cu no tabata necesario e uzo di tapaboca den studiantenan completamente vacuna. Incluso a extende e recomendacion aki na docentenan cu a completa nan skema di vacunacion contra Covid-19.
Na otro banda, e Academia Americano di Pediatria (AAP) a reacciona y a contradeci e recomendacionnan di CDC y a aconseha e uso di tapaboca, incluso, pa muchanan for di 2 aña di edad.
Awor mester menciona cu recientemente por a mira na Merca un aumento di e casonan di Covid den muchanan menor di 12 aña y esaki a causa hopi preocupacion cerca e mayornan.
Na Aruba, por a mira cu tin un grupo cu ta pensa cu e tapaboca no ta necesario den e grupo aki ya cu esaki por afecta, entre otro, nan desaroyo cognitivo. Pero na otro banda, tin e grupo di mayornan cu si ta keda preocupa pasobra ta net e grupo aki di muchanan ta esun cu no ta vacuna contra Covid-19.
Pesey e pregunta a surgi riba ki dia DVG ta bay anuncia e fecha cu e muchanan di 5-11 aña ta bay wordo vacuna, principalmente mirando e aumento den e casonan nobo di e variante omicron. Esaki por significa cu lo por cuminsa pensa mas lihe posibel riba un fecha pa evita cualkier contagio teniendo cuenta cu e inicio di scol.
DIARIO a haya confirmacion cu Crisis Team ta reuniendo e siman aki pa analisa e tema y sigur lo anuncia pronto ki dia e vacunacion lo inicia.
