Status Aparte a haya e contenido pa cual Aruba a hiba un lucha sagrado - *Evelyn Wever-Croes a duna contenido na Aruba como partner den Reino - *Fayo di Aruba a wordo acepta y coreccion a wordo haci na loke tabata robez
ORANJESTAD (AAN) — Na momento cu ya e constelacion anterior di Parlamento a despedi dia 7 di Juli 2021, Evelyn Wever-Croes como Prome Ministro di Aruba a reuni cu Raymond Knops, kende tabata e representante di Hulanda y Reino durante uno di e etapanan mas importante den historia di Aruba.
Na 1983, ora Betico Croes a entrega Aruba e Status Aparte tan anhela, el a papia di e base di e lucha di e Arubianonan cu a pidi mas cu un relacion estatal nobo.
Aruba a pidi Reino respet pa su poblacion, pa su cultura, pa su realidad como Pueblo como parti di Reino segun Statuut. Esaki tabata e alma di Status Aparte y e lucha increibel cu Aruba a hiba sin hala atras bou direccion di Betico Croes.
Pa sostene e lucha di autonomia di Aruba, Betico Croes a exigi un moneda y un Banco Central di Aruba, cu asina por a hiba su propio maneha monetario loke a haci posibel pa e plan di rescate cu a wordo introduci na 1985 y cu a haci cu Aruba por a para garantia pa companianan cu a wordo atrae hasta cu riesgo grandi pa e pais.
Na 2014 Reino Hulandes a yega Aruba pa presenta e lista di fayo di Aruba. Na 2014 ora Reino Hulandes a exigi Gobierno Mike Eman cambio di su maneho, el a hiba Aruba directamente na e convenio cu Aruba a hiba pa autonomia di Aruba den Reino, manera e acuerdo di Status Aparte tabata contene.
Mike Eman no kier a acepta fracaso di e maneho financiero y economico cu el a hiba y a confronta Reino cu un huelga di hamber, cu a bira deshonor pa e autonomia di Aruba. Hulanda a impone supervision financiero y Aruba no por a hala atras pasobra na 2014 moneda di Aruba, Florin Arubano tabata na peliger mientras economia di e pais tambe tabata un desaster.
Den Tweede Kamer a surgi pregunta ora na 2016 Gobierno Mike Eman a bay uni cu Nicolas Maduro pa Citgo den tur e riesgonan cu esaki tabata contene. Pero Gobierno Hulandes a mustra cu e no por actua pero si a sigui insisti riba un maneho financiero nobo pa evita cu Aruba lo a wordo declara bancarota loke tabata nifica fin di Status Aparte, fin di Florin Arubano.
Na 2017 eleccion a trece cambio. Evelyn Wever-Croes a enfrenta Hulanda pa por a scapa Aruba den e desastre financiero.
No tabata tin luga pa mentira den e relacion nobo cu Hulanda, cu tabata tin tur razon pa tene Gobierno di Aruba respensabel pa mal maneho.
Evelyn Wever-Croes a acepta e berdad. A acepta cu Aruba tabata tin mester di e asistencia financiero Hulandes y coreccion di e rumbo financiero cu Aruba tabata aden.
Por a nota un cambio den e relacion den Reino cu a haci posibel pa Aruba y Reino por a yega na un acuerdo ora un pandemia a uni na 2020 na e crisis financiero existente.
Si Evelyn Wever-Croes no tabata un dirigente cu por a admiti caminda maneho di Aruba a bay robez den man di gobierno anterior y no a coregi e situacion cu tabata pone Florin na peligro, e no por a enfrenta Hulanda, cu mester a respeta Aruba cu pa yega na cambio di e loke Hulanda a presenta, a haci un prestamo pa carga Aruba na e momentonan mas dificil.
Un relacion nobo cu Hulanda ta loke Evelyn Wever-Croes a logra como Prome Ministro na momento cu Aruba mester recupera financieriamente y riba tereno economico pa Aruba por tin futuro y pa e futuro generacionnan di Aruba por sigui carga bienestar di nan pais.
Uno di e logronan mas grandi di Gobierno Wever-Croes ta keda e relacionnan nobo den Reino cu a duna contenido na Status Aparte di Aruba.
