Edgar Vrolijk encarga cu Presidencia temporal di Parlamento cu constelacion nobo - *Formacion di un gobierno cu mester dirigi Aruba den un fase historico ta haya inicio - *Un mayoria di 11 asiento contra oposicion di 10 of 9 asiento ta negocia un coalicion nobo
ORANJESTAD (AAN) — Cu Aruba no tin tempo pa perde, ta loke e realidad economico, financiero y social ta indica. Un grupo grandi di miembro di comunidad di Aruba, tabata tin temor pa un temporada largo di formacion na un momento cu recuperacion ya a wordo inicia.
Stabilidad politico ta wordo exigi pa e futuro directo di Aruba, cu den eleccion a dicidi pa continuacion di e maneho di Gobierno Wever-Croes.
Na momento cu Parlamento di Aruba a reuni ayeramainta y por a scoge un Presidente di Parlamento cu mester di sosten di mayoria di Parlamento, ya tabata obvio cu Aruba tin un base pa negociacionnan di un gobierno nobo cuminsa.
E miembro di fraccion di MEP, Edgard Vrolijk a wordo eligi como Presidente di Parlamento y a confirma ayera cu e nombramento aki ta temporal te na momento cu un coalicion dicidi riba e ocupacion di e puesto. E miembro di RAIZ, Ursell Arends, a wordo eligi como Vice Presidente, tambe pues cu caracter temporal te na momento cu un coalicion nobo dicidi.
E votonan di partidonan MEP y RAIZ a duna prueba cu e dos partidonan a alcansa un base pa hunto negocia formacion di un Gobierno nobo loke a wordo confirma oficialmente ora informacion a drenta di tanto Gobernador, a base di informacion cu el a ricibi di e dos Informadornan, como di e partidonan den gobernacion.
Aki ta papia pues di inicio di e fase directo di negociacion entre MEP y RAIZ, cu hunto tin un total di 11 di e 21 asiento di Parlamento cu na e momento aki conoce un situacion historico.
Pa prome bez den historia di Aruba, e cantidad di miembro huramenta di Parlamento, ta forma un total di 20 debi na e hecho cu uno di e miembronan eligi, Benny Sevinger, ta den detencion preventivo den prison.
E presencia y participacion di Benny Sevinger na Parlamento pues no ta depende di un problema politico cu a interferi den e cantidad normal di miembro, ni di malesa of ausencia pa motibo valido.
E presencia di Benny Sevinger den Parlamento ta depende si e tin libertad pa por atende cu trabou di Parlamento pasobra ya e no ta den prison.
Esaki ta haci cu oposicion den Parlamento ta 10 of 9 dependiente di asistencia di Benny Sevinger.
Mientrastanto e hecho cu MEP y RAIZ a alcansa un base pa negocia formacion di un Gobierno nobo, a wordo ricibi cu alivio den tur sector na Aruba cu ta depende di stabilidad di gobernacion.
Un sondeo di DIARIO a mustra cu e forma cu RAIZ a presenta su mes como partido, ta duna tur indicacion cu e por crea e base cu Aruba mester di gobernacion serio na e momentonan aki.
RAIZ y MEP awor mester negocia un plan di gobernacion den cual e relacion cu Hulanda, pero tambe e recuperacion financiero y economico pa asina yega na resultadonan social, ta hunga un papel importante.
E creacion di empleo pa medio di recuperacion economico, tambe mester wordo discuti entre e dos partidonan.
Manera ta conoci, MEP a duna inicio na recuperacion a base di su Master Plan, cu ta base di e maneho cu e kier continua y den cual manera ta conoci ta inclui atraccion di proyectonan pa amplia e base economico di Aruba cu no por conoce recuperacion solamente pa medio di turismo.
E recuperacion aki lo mester garantisa suficiente entrada pa e pais, loke lo haci cu e peso di belasting no ta sigui subi y cu comercio local tambe ta conoce crecemento y asina sostene e clima social di Aruba.
Ayera pues por bisa e resultado di eleccion 2021 a drenta e fase conclusivo di negociacion concreto entre dos partido, cu a dicidi pa un reunion na Faro, punto di claridad, pa por firma un acuerdo di intencion pa yega na un gobierno nobo pa Aruba.
