Aruba a papia un idioma cla y a duna oportunidad pa dos partido forma Gobierno - *Wega infantil cu voto pa spirito, Benny y reconteo mester wordo haci den rumshop - *Parlamento ta pa beneficio di Pueblo y no ta circo pa hende cu mester di atencion
ORANJESTAD (AAN) — Loke a pasa diahuebs den Parlamento ora mester a eligi un Presidente nobo pa representacion di Pueblo di Aruba, no tin nomber.
Ta un berguensa cu ya durante e prome reunion pa dicidi kende lo dirigi e asamblea cu ta cara di Aruba, tabata tin representa cu a pensa cu nan mester haci wega cu nan trabou.
Ta bon pa tur cu a huramenta diahuebs y asina dilanti Dios a bisa cu nan lo traha na interes di Aruba, comprende cu no tin espacio mas pa wega ni nivel barata cu a cualifica tantisimo reunion di Parlamento durante e temporada 2017 pa 2021.
Momentonan di berguensa pa Aruba como pueblo sano a keda registra ora nivel tabata baha te na suela pa loke tabata oposicion y Pueblo a vota pa keda oposicion, tabata lastra hende na suela pa asina nan sconde loke a wordo descubri.
Ayera den horanan di mainta, personanan cu pa medio di eleccion a wordo eligi pa Parlamento, a presta huramento. Un momento sagrado pa personanan cu ta kere den Dios, cu mester wordo respeta tambe pa tur persona cu ta kere cu nan ta dios na mundo.
Aruba no tin tempo mas pa un nivel politico cu Aruba a rechasa.
Ya tabata un mancha pa Aruba, pa Gobernador mester a evita, cu un persona den prison pa sospecho di crimen, lo tabata parti di e escenario ora huramentacion tabata tuma luga.
Ta un berguensa pa Aruba, cu su moral halto, cu e miembro eligi pa Parlamento no tabata presente, pasobra e ta encarcela y no por haci su trabou como miembro di Parlamento.
Tabata un berguensa atrobe pa Aruba ora na momento di votacion pa e puesto tan importante di Presidente di Parlamento, un mente cu no ta coresponde na e mente y moral di Aruba, a dicidi cu e ta depone un voto extra, pa asina vota pa Benny y reconteo.
Mas abou nivel no por a baha.
Ta bon pa tur cu ta haya placa pa nan traha y sirbi Pueblo comprende, cu Parlamento no ta un circo ni luga di reunion di payaso. Parlamento no ta luga pa bin hunga tiger pero pa respeta e moral di e Arubiano cu no ta amigo di wega infantil barata.
DIARIO ta rechasa loke a pasa na salida di un constelacion nobo di Parlamento, caminda obviamente tin un persona cu no por yama su mes representante berdadero di Aruba, pasobra su moral, su nivel di decencia, no ta e moral ni nivel di decencia di Aruba!
