Recomendacion di CAFT di baha gasto di producto y servicio lo nifica cu vacuna di Covid-19 no lo por ta gratis mas

Minister Xiomara Maduro a indica: --- *Lo mester cera Tra'imerdia tambe

ORANJESTAD (AAN):  Dialuna mainta, Minister di Finansas y Cultura, Xiomara Maduro a convoca un rueda di prensa unda el a duna basta informacion riba Finansa Publico di Aruba.

            E mandatario a indica cu riba debate publico y den Parlamento siman pasa a surgi preguntanan riba e situacion financiero y tambe e corespondencianan cu a wordo hiba cu CAFT, cual ta e organo di supervision financiero di Aruba.

            Den esaki, a bisa, tin algun interogatorio riba topiconan cu ta wordo discuti entre otro, locual ta gastonan pa servicio y producto, gastonan di huur cu a subi di cual a pidi mas informacion, como tambe gastonan di experto.

            Maduro a expresa cu den e debate publico ta wak cu tin criticanan y cuestionamento. Pesey ta bon pa pasa den e informacion aki.

            El a inicia cu e recomendacionnan cu CAFT a duna na prome instante y cu despues nan a keda ripiti y cu gobierno a keda splica tambe riba e parti aki. "Pero mi ta kere ta bon a awe tambe nos haya splica esaki den un forma simpel pa asina comunidad henter por sigui e discusion y por compronde tambe kico ta locual cu ta pasando aworakinan", a manifesta.

            Minister Maduro a sigui bisa cu locual ta e consehonan di CAFT, a cuminsa dia 2 di Juni. El a bisa cu ta importante pa menciona cu ta 13 recomendacion y a enfoca den kico nan ta encera.

            E prome tabata pa baha gasto di producto y servicio cu 39 miyon florin. Durante di tratamento di presupuesto 2022 a traha un nota di cambio di cual a baha e suma di producto y servicio cu 13 miyon. Pero CAFT ta keda insisti cu mester baha mas.

            Pa cu esaki gobierno a duna un splicacion breve caminda kier pa corta 28 miyon, pero si gobierno cumpli cabalmente cu e recomendacion aki, esaki lo encera cu gobierno no ta paga gasto pa vacuna di Covid-19, cu gobierno no ta cumpra computer pa Polis, pa Censo y otro departamentonan cu ta esencial pa e servicio publico, e mandatario a splica.

            Tambe ta encera pa gobierno cera Tra'imerdia locual kiermen cu e muchanan ta keda sin opvang y cu tur leidster ta perde nan trabao na Tra'imerdia.

            Banda di esey, no lo por paga pa cuminda y remedi pa prizonero como tambe pa adicto. Den esaki tambe tin e edificio di John F. Kennedy caminda cu ta wak cu a integra tur e departamentonan cu tin di haber cu enseñansa. E hendenan aki lo mester wordo poni otro caminda. Esaki ta algo cu no ta realistico, a remarca.