Forsa financiero propio mester ta proposito den reforma pa futuro --- *Autonomia ta basa riba interdependencia di partnernan igual --- *Haltura di debe nacional ta decisivo pa miembronan Union Europeo
ORANJESTAD(AAN)—E diferencia entre dependencia y independencia ta e capacidad di un persona pa haci uzo di su propio posibilidadnan pa para riba su pia.
Uno di e aspectonan cu ta dicidi pa e capacidad aki, ta e forsa financiero di un persona pa por cumpli cu su debernan y necesidadnan financiero, cu mester ta den balansa cu otro.
Den e mundo material cu Siglo 20 a haci un realidad pa hende cu a subi jet, cambia burico y cabay pa auto y cumpra articulonan di marca, e cultura di crea debe a bira un menasa pa e pensamento Arubano, pa Arubianismo, cu ta alma di Status Aparte..
Evita cu e Arubiano por bira victima di su lealtad na Arubianismo, tabata base di e lucha pa Aruba tin Husticia den su man y en todo caso, Ministerio Publico.
Introduci un Banco Central y Florin propio pa Aruba tabata e otro exigencia, cu a haya hopi resistencia den e lucha cu e pais a hiba pa alcansa su futuro estatal autonomo.
Aruba a insisti riba su autonomia financiero pa un simpel motibo. Sin autonomia financiero, un pais no tin e dependencia necesario pa por papia di Status Aparte ya cu e no ta riba su propio pia ni ta depende di solamente su mes den realidad di mundo.
Ora nos mira Europa nos ta mira un forsa financiero cu ta exigi pa tur pais tene nan mes na tur regla cu Union Europeo y participacion den Euro ta exigi.
Uno di e reglanan ta, e haltura di debe cu un pais por tin pa asina evita cu un pais ta perhudica otro a base di e relacionnan cu nan tin cu otro.
E soberanidad di un pais, di un hende, di un instituto, ta depende di e grado di dependencia cu e tin enfrente otro.
Naturalmente mundo ta basa riba interdependencia cu ta base di convivencia den cual tur hende mester di otro pa mundo funciona.
Hasta den situacionnan financiero ta papia di interdependencia, cu ta logico y sano compara cu dependencia.
Interdepencia ta nifica cu cada uno ta duna loke e tin tanto material como no material pa asina forma un comunidad.
Dependencia ta nifica cu hende ta entrega nan boluntad, nan caracter propio, hasta nan principio, contrario na independencia den cual hende ta uza su concenshi, ta keda su mes.
Ora papia di un Florin fuerte, ta papia di un moneda cu ta permiti un Pueblo y asina su Gobernacion, di tuma decisionnan sano cu ta permiti interdependencia cu resto di mundo, pero no ta haci cu e pais mester entrega su balornan, normanan y cultura pasobra e tin debe.
Pa comprende autonomia por contempla diferente momento y realidad den Reino Hulandes, cu un parti Caribense y un parti Europeo cu ta dos mundo distinto hasta pa loke ta trata clima.
Pero den Segundo Guera Mundial, Princesa Juliana a bishita e islanan y a mustra con dushi ta pa ta riba teritorio Hulandes, cu ta encera cu e tabata na cas.
Migracion di un parti di Reino ta mas cu conoci.
Autonomia: interdependencia, autonomia, convivencia y union a base di respet mutuo.
Esaki ta solamente posibel ora forsa di Florin no ta basa riba yudansa di Hulanda of cualkier otro pais, pasobra politiconan di Aruba a crea debe.
E palabra “debe” ta papia pa su mes. E palabra debe ta encera un obligacion enfrente otro persona y ta kibra autonomia, libertad riba tur tereno y un bon relacion a base di respet mutuo segun e concepto cu ta carga Statuut y Status Aparte.
E palabra debe ta contradeci tanto Statuut como Status Aparte, cu ta basa riba e concepto di autonomia, di paisnan liber y Pueblo liber!
