Covid-19 no a habri e porta spera pa cambio den produccion energia - Prijs di awa y electricidad mas abou na Aruba den un mundo na careda - Atractivo pa inversionistanan cu hunto cu Quanten mester rebiba economia
ORANJESTAD(AAN)- Mientras rond mundo alarma tabata sona pa e prijs di awa y coriente cu lo tin impacto grandi den e aumento di prijsnan rond mundo cu mester biba cu prijsnan mas halto di coriente, DIARIO ta keda en busca di mas informacion di e status di e proyecto di Eagle LNG cu na varios forma mester yuda Aruba den e crisis severo di prijs di petroleo.
Den mundo politico a wordo pensa, cu Prome Ministro Evelyn Wever-Croes e motor grandi tras di e proyectonan Quanten y Eagle LNG, lo a uza temporada di eleccion pa promove e dos proyectonan cu ta negocia nan entrada cu Refineria di Aruba.
Eleccion a pasa y no a tende nada di e dos proyectonan cu ta bira central awor pa Aruba den un situacion mundial, cu ayera solamente a empeora despues cu e reunion di OPEC no a honra e demanda mundial pa subi produccion di petroleo y asina evita cu e prijs di petroleo ta sigui subi y causa un aumento di prijs rond mundo.
DIARIO, manera su produccionnan anterior e siman aki a demostra, a keda den contacto continuo cu informantenan experto na Aruba, Merca y Europa cu aceso internacional na informacion economico.
Mientras e sector mundial financiero y economico tabata den shock ayera debi na e prijs di petroleo cu ta parce di ta sigui aumenta, empresanan mundial a cuminsa expresa nan preocupacion pa nan recuperacion despues di Covid-19.
Empresanan mundial grandi mester haci cambio den nan pronosticonan di recuperacion debi na e hecho cu e caida di balor di placa dor di e aumento di costo di bida, lo crea un spiral cu lo stroba recuperacion economico y comercial pero na mes momento ta trece incertidumbre grandi riba tereno social debi na e forma cu costo di bida ta ataca hende.
Sigur e prijsnan di awa y coriente ta ocupa un lugar importante ora ta papia di costo di bida, pero tambe costo pa haci negoshi.
Empresanan rond mundo mester reduci nan gastonan y esaki por afecta personal cu cu lo por perde nan trabou debi na e resultadonan di inflacion cu lo stroba companianan recupera despues di e crisis di Covid-19.
Manera DIARIO a trece dilanti, Aruba tambe lo conoce e shock tremendo di aumento di prijsnan sigur debi na e hecho cu Aruba ta depende di importacion di productonan cu pa un parti importante ta bini di paisnan cu mester aumenta nan prijsnan debi na e aumento di prijs di produccion afecta pa prijs di energia.
Aruba ta keda central pa DIARIO, cu for di ayera a mustra Aruba cu mester tene e inflacion na 2021 produci pa prijs mas halto di coriente na bista y cu mester sigui tur noticia ya cu tin indicacion grandi cu na 2022 lo no logra controla e resultadonan di inflacion riba tereno mundial.
DIARIO a sigui traha riba cifranan y desaroyonan economico y financiero di Aruba y den curso di ayera a ricibi informacion di exterior cu aparentemente e dos proyectonan grandi Eagle LNG y e consorcio Quanten, a sigui negocia cu Aruba y ta mantene nan interes pa establece na Aruba.
Esaki ta nifica cu e recuperacion economico di Aruba lo no depende solamente di turismo, cu tambe ta na riesgo si costo di bida subi mescos cu costo di entre otro transportacion y turismo general.
Central den e recuperacion di Aruba ta dos compania cu lo trece cupo di trabou, lo activa economia y comercio local, pero den caso di Eagle LNG directamente lo trece un alivio pa Aruba riba tereno di produccion di awa y coriente.
Tanto pa habitantenan di Aruba como pa empresanan di Aruba cu lo no por conta mas cu asistencia financiero di Gobierno manera te awor ta e caso, e proyecto Eagle LNG lo baha e gastonan di awa y coriente cu ta afecta tur prijs na Aruba.
DIARIO ta trahando pa haya mas informacion riba e fase cu negociacionnan entre Aruba y Quanten y Eagle a alcansa.
Mester tene na consideracion cu na e momentonan aki e cantidad di inversionistanan cu kier participa den negoshinan petrolero a bolbe aumenta, loke sigur ta un bon noticia pa Quanten, cu ta un consorcio den cual un grupo di negoshi ta participa.
