Den un mundo na careda pa mas carbon, petroleo y gas pa sobrevivi - E refineria hancra den ayera ta basha abou pa construi un futuro - For di bista publico dos proyecto crucial pa Aruba na 2022 ta culmina
ORANJESTAD(AAN)- Na 2020, Evelyn Wever-Croes como Prome Ministro di Aruba a presenta dos proyecto na e pais.
Un proyecto tabata pa Aruba bira distribuidor di gas den region di Caribe y e otro establecimento di un refineria moderno na Aruba.
E situacion financiero cu Evelyn Wever-Croes a hereda y cu e mester a soluciona for di e momento cu el a keda encarga cu mando di Aruba, a haci cu e no por a uza su posicion como Prome Ministro pa bira popular pero mas bien mester a splica Pueblo cu mester paga mas belasting, cu no tin mas placa pa fiesta y tur loke ta desagradabel ora hende mester bay cana busca voto.
Asina mes su Gobierno mester a adelanta eleccion 2021. Segun e teoria di mundo politico populista, Evelyn Wever-Croes lo a haci uzo di e proyectonan Quanten y Eagle LNG pa e trata di gana eleccion.
Esaki no a sosode y Evelyn Wever-Croes den bataya electoral a splica Aruba cu situacion financiero mester a haya solucion cu ayudo Hulandes.
E proyectonan di refineria Quanten y Eagle LNG a keda scondi tras di cortina politico na un momento politico crucial cu tabata eleccion y casi a perde atencion publico den formacion di Gobierno.
Na San Nicolas un refineria bieu ta basha abou mientras mundo ni sikiera kier papia di petroleo of gas.
Evelyn Wever-Croes a forma su segundo Gabinete cu Raiz y a sigui traha.
Siman pasa, mundo a haya su mes na careda. Na e paisnan mas grandi na mundo, problema pa produci suficiente coriente a presenta.
E demanda pa coriente, gasolin, tur loke ta energia a baha mundialmente durante Covid-19 pero como mundo a cuminsa recupera di Covid of hasta sin recuperacion kier a cuminsa haci negoshi atrobe, a resulta cu no tin suficiente gas ni petroleo pa entre otro produci electricidad.
Na careda mundo a sali en busca di carbon, petroleo y gas pa mantene su produccion cu a bira mucho mas caro pasobra e paisnan di OPEC a dicidi cu nan no ta produci suficiente petroleo pa baha e prijs di petroleo y gas.
Un scarcedad di gas y petroleo pues rond mundo a haci mundo realisa cu tin algo cu yama planificacion y cu no por deshaci di petroleo y gas sin mas.
Ayera mundo a haya e prueba di e lugar cu petroleo y gas ta hunga ainda na mundo, cu yega na un mundo diferente den fase.
Ora DIARIO a analisa tur loke ta pasa hunto cu expertonan, e posicion unico di Aruba ta bini dilanti.
E proyectonan Quanten y Eagle ta pendiente. Eagle kier distribui gas den region di Caribe pero na mes momento Aruba ta haya un prijs preferencial pa su produccion di awa y electricidad loke lo haci cu e prijs di awa y coriente lo tin oportunidad pa baha ya cu su prijs di produccion tambe lo baha.
Si Quanten, cu ta un concorsio y den e situacion mundial nobo sigui atrae interes pa participacion sigur pa medio di su union cu Gobierno Mericano, e por yuda Aruba deshaci di e restonan di e refineria bieu di Lago.
Cu Quanten Aruba por traha no solamente riba un refineria cu ta tene cuenta cu cambio di clima pero tambe por traha riba energia produci pa entre otro energia solar cu tambe ta den plannan di Quanten.
DIARIO ta traha duro pa guia Aruba den e situacion nobo. Importante lo ta informacionnan cu mester bini di Ministro Glenbert Croes, kende awor ta encarga cu Energia y cu e proyectonan aki tambe.
Proyectonan cu a yega Aruba pa medio di e vision di Prome Ministro Evelyn Wever-Croes, e politico cu un caracter diferente, cu no a uza dos proyecto pa pone Pueblo baila y haci wega politico, pero cu a saca e proyectonan tan importante pa Aruba for di e ambiente politico pa asina awe den tur trankilidad, Aruba por tin e posibilidad grandi di haya awa y coriente mas barata mientras mundo ta na careda pa cumpra carbo, gas y petroleo na prijsnan hopi halto, cu lo bin afecta Aruba tambe pero sin e impacto total si Aruba por conta cu Quanten y Eagle LNG.
