Proyecto local y cooperacion internacional uni pa proteccion di nos naturalesa

Dr. Eric Mijts di Universidad di Aruba

ORANJESTAD (AAN): Den contexto di e 21 edicion di Overseas Countries and Territories - European Union Forum, e rol di proyecto local y conocemento academico a keda bisto como elemento esencial pa enfrenta e reto ambiental cu islanan manera Aruba ta confronta.

Dr. Eric Mijts di Universidad di Aruba a comparti su experiencia riba e participacion di Aruba den e programa europeo BESTLIFE2030, cu ta duna sosten concreto pa iniciativa di conservacion y desaroyo sostenibel.

   Segun dr. Mijts, Aruba recientemente a presenta e proyecto REEFLECT, un iniciativa cu ta construi riba e base di e proyecto anterior Turning the Tide, enfoca riba restauracion di ecosistemanan tanto na tera como den lama.

   “Nos ta trahando riba recuperacion di mangel y rif di coral, cu ta esencial pa biodiversidad y proteccion di nos costa,” segun Mijts.

   E proyecto REEFLECT ta pone enfasis riba sostenibilidad a largo plaso, incluyendo creaccion di un base di boluntario y uzo di tecnica moderno manera plantacion di fragmentonan di koraal y desaroyo di rif artificial.

   El a indica cu e trabaonan aki ya ta resultado di varios aña di colaboracion entre Universidad di Aruba, organizacionnan local manera Aruba Conservation Foundation y partnernan academico internacional.

“Den pasado a desaroya conocemento y practica local pa restauracion di rif, y awor nos por escala e impacto di e trabaonan aki,” el a añadi.

   Mijts a subraya cu e situacion di rif di coral na Aruba ta un reto serio, considerando cu gran parti di e cobertura y diversidad di coral a perde durante decadanan pasa.

   “Rif di coral no solamente ta importante pa naturalesa, pero tambe pa pesca, turismo y proteccion contra evento di tempo extremo,” el a splica.

   Den e contexto aki, e apoyo di Union Europeo ta considera fundamental pa islanan chikito, kende ta enfrenta limitacionnan den recurso y capacidad.

   “Cu sosten di Union Europeo, nos por crea red di colaboracion y haya e medio pa implementa solucionnan concreto na tereno,” segun Mijts.

   Ademas di BESTLIFE2030, Universidad di Aruba ta involucra den varios otro proyecto financia pa Union Europeo, incluyendo e programa SISSTEM pa solucionnan sostenibel, investigacion den diversidad linguistico y iniciativa internacional riba turismo y patrimonio natural.

   E participacion activo di institucionnan academico den e foro OCTA ta resalta e importancia di integra conocemento, investigacion y cooperacion internacional pa logra un desaroyo sostenibel y resiliente pa Aruba.