Proyecto anual “Back to School Food Bags” a logra yuda 50 mucha den necesidad

Lions Club Aruba

ORANJESTAD (AAN): Lions Club Aruba a realisa cu exito su proyecto anual Back to School Food Bags, un iniciativa di e Comision di Hunger Relief cu ya a bira un tradicion den e organisacion i den comunidad.

Cada aña, na luna di Juli, cartanan formal ta wordu manda na varios compania rond di isla pa pidi donacion di cuminda y bebida. Miembro di Lions ta bay busca e donacionnan ariba e dianan previamente y ta wordo poni den Lion’s Den pa preparacion di e distribucion.

Durante e ultimo weekend promer cu scol cuminsa, miembro nan ta reuni den Lion’s Den pa haci e preparacion y organisacion di tur material. Durante e weekend aki tur saco ta wordo yena y despues distribui na miembronan di Lions cu ta reparti nan na scolnan pa mucha cu tin necesidad.

A proyecta pa e aña aki pa yena 80 sacon, pero finalmente nan a logra 50 saconan, cu apesar di e cantidad mas abou, e impacto keda hopi significativo.

E proyecto Back to School Food Bags ta keda un experiencia inspirado pa tur hende cu ta participa. Como Lions, nan ta kere cu “caring is giving”, y ta honra nan lema mundial: “WE SERVE.”

Por ultimo Aruba Lions Club ta compromete nan mes pa sigui traha hunto cu su partnernan pa yuda mehora e calidad di bida di e pueblo pa medio di su diferente programa di servicio manera esun di Hospital Bed y Wheel Chair, Smile Mobile, Feria di Salud, y otro nan.