Pronto lo por admira “Soldachi di Caribe” riba Plaza Comercio

Minister Wever a anuncia:

ORANJESTAD (AAN):  Despues cu na mei 2024 durante e ‘Orange Economy Symposium’ Minister Geoffrey Wever a anuncia un 'Open Call' na artistanan local pa produci un instalacion artistico na Plaza Comercio na Oranjestad, porfin por anuncia cu esaki pronto lo bira realidad.

Despues cu 3 artista local a entrega nan concepto, un comision independiente a scoge e arte ganador, yama “Soldachi di Caribe” entrega door di sr. Ciro Abath y sr. Nigel Matthew. Minister Geoffrey Wever y Minister President Mike Eman a anuncia e proyecto aki.

E iniciativa aki ta pa sostene e desaroyo di e industria creativo di Aruba como tambe haci Oranjestad un ciudad mas atractivo pa local y turista. Tur e esfuersonan aki ta pa subi e viabilidad comercial di e area y alabes probecha pa duna sosten real na crecemento di nos industria creativo local. Nos industria creativo tin potencial enorme y lo contribui na diversification di nos economia. Autenticidad ta un factor esencial den e industria di servicio ultimamente, y bishitantenan local y internacional ta constantemente en busca di esaki.

E obra di arte aki lo fungi como un luga pa saca potret cual por ser comparti mundialmente via diferente rednan social.

“Como parti di revitalisacion di Oranjestad, Gobierno AVP-FUTURO ta contento di cuminsa wak e resultadonan.” Minister wever a cuminsa ta bisa. Awor cu instalacion di “Soldachi di Caribe” nos kier sigui enrikece e panorama cultural di entre otro Plaza Comercio y celebra e spirito di Oranjestad."

E proyecto di “Soldachi di Caribe” tin un grandura di 2.10m x 2.10m y lo tuma alrededor 10 luna pa construi y oficialmente instala. Minister Wever ta desea sr. Abath, sr. Matthew y nan team tur clase di exito cu e proyecto.