Nos no ta bisa ayo, nos ta bisa ‘te otro biaha’
ORANJESTAD (AAN): Diaranson den un ambiente carga di sentimento y respet, na Aurora Funeral Home a tuma luga e despedida di un ser humano excepcional: Sr. Johnny ‘Django’ Simoons – periodista, amigo fiel y pionero firme den mundo di periodismo aki na Aruba. Un persona kende semper tabata fiel na DIARIO.
Cu hopi dolor pero gratitud den curason, famia, amigo, y ex coleganan di DIARIO a reuni pa honra un persona cu su legado lo keda presente den comunidad pa semper. E palabranan di cariño, respet y admiracion a yega profundo den e sala di despedida: “Ayo na un excelente persona, un tremendo colega, un homber cu un curason noble y un pasion sin limite pa su trabao.”
Johnny ‘Django’ no tabata simplemente un periodista; e tabata un luchador pa berdad, un bos di pueblo, un guia pa hopi cu a sigui su pasonan den mundo di periodismo. Su integridad, entrega, y manera humano di trata hende lo keda bibo den e memoria di tur esnan cu tabatin e honor pa conoc’e y traha hunto cu ne.
Awor, ta confia cu Django ta sosega dushi den brasa di Señor – un paz mereci despues di un bida dedica na servicio, amor y entrega pa su prohimo. Su smile, su manera directo pero sincero, y su amor pa periodismo lo sigui ilumina nos caminda.
“Nos ta haya forsa den nos duelo, sabiendo cu e legado di Django lo sigui inspira generacionnan futuro. Cu su alma haya pas y su memoria keda bendiciona”, asina algun ex colega di DIARIO a bisa.
Descansa na paz, kerido Django. Nos no ta bisa “ayo”, nos ta bisa “te otro biaha.”
{gallery}Descansa na paz, kerido Django{/gallery}
