Prome Minister Mike Eman a asisti na seminario riba impacto climatico na Universidad di Aruba

ORANJESTAD (AAN):  Prome Minister mr. Mike Eman a asisti na e presentacion di “Climate Impact Atlas Aruba” na Universidad di Aruba tocante e impacto di cambio climatico riba Aruba,

particularmente si nos no cambia e rumbo di desaroyo actual. Durante e presentacion, a enfoca riba e necesidad urgente pa traha riba un scenario balansa, den cual no solamente ta fortifica e resiliencia di nos isla contra e efectonan climatico a largo plaso, pero tambe proteha nos recursonan natural y biodiversidad.         

            Prome Minister Eman a duna un discurso inspirado, den cual a enfatisa cu nos comportacion como comunidad mester cambia. “Mester cambia e mentalidad di gratificacion inmediato pa uno di satisfaccion duradero. Nos mester pensa riba futuro”, segun Prome Minister Eman. A bira tempo pa cuminsa pensa den termino di “nos” na luga di “mi,” y mester re-evalua kico nos kier laga pa e generacion cu ta sigui.

            Ademas, Prome Minister Eman a pone enfasis riba e importancia di continuidad den maneho, for di un administracion pa otro, pa logra progreso real. Prome Minister a reconoce Juliette Carvahal como un berdadero tesoro den e lucha pa un Aruba mas sostenibel. Tambe a duna ex-Minister di Naturalesa sr. Ursell Arends credito pa su compromiso cu naturalesa y  medioambiente.

            Continuidad ta importante pa progreso y Prome Minister a lamenta cu despues di tabata pafo di Gobierno pa casi ocho aña, y awo cu e ta bek, no a mira ningun progreso significante den e transicion for di energia fosil pa energia renovabel, pero awo como Minister encarga cu naturalesa, tin e compromiso profundo pa acelera e cambionan necesario den e maneho di naturalesa y medio ambiente.