Homenahe na Rembrandt di e pintor Arubiano Gustave Nouel

ORANJESTAD (AAN): Diadomingo na Hulanda, tabatin mercado nacional cu diferente disciplina di arte riba Plaza De Brink.

   Esaki ta un mercado estilo na ‘Montmartre’ di Paris y otro luganan turistico).

   E artista di Aruba, Gustave Nouel kende ta specialista den portret contemporaneo, ta invitado especial (atrobe) pa comparti su performance di pintura ‘Homenahe na Rembrandt’ cu publico presente na Deventer.

   Durante su hubentud, Gustave a logra hopi experencia artistico riba plaza y caya internacionalmente, entre artista y pintornan di henter mundo. GN a haci hopi hende feliz cu su “portretnan crea riba caya”.

   Riba ‘De Brink’, e plaza central di Deventer,  Gustave lo bin cu varios miembro di asociacion di artista Deventer Amateur Kunstenaars (DAK) y artista regional  cu a sigui su cursonan universal di sketch y pinta portret.

   E artista Arubiano Gustave Nouel lo guia e artistanan Hulandes aki, con pa haci e publico contento, a cambio di un contribucion voluntario!

   Asociacion di artista DAK a acerca Gustave algun aña pasa y a pidi e pintor Arubiano pa guia nan miembronan artista cu su expertise den Arte en general y street-portraits en particular.

   Ultimo añanan e Arubiano a comparti su experticio na Centro Cultural Kunstcircuit, na su atelier priva y cu artista miembro di asociacion DAK.

    Algun artista profesional reconoci cu DAK ta selecta, ta guia otro artistanan di region, riba tur nivel, den diferente disciplina. Tin artista di tur nivel cu amor pa arte cu ta miembro di DAK. Di principiante te cu maestro di arte y hasta artista academico, Pasion t’e motor principal cu ta move artista di DAK.

   Debi n'e  gran interes p'e performance/demostracion di pintura cu Gustave Nouel a comparti internacionalmente pa hopi aña caba, e pintor di portret Arubiano cu ta biba na Deventer ta bisa cu el a dicidi di continua cu su ‘Homenahe na Rembrandt’ y comparti esaki mientras e por.