ORANJESTAD (AAN)- Diabierna 29 di October a duna comienso na e siman di Festival di buki pa Mucha”. Prome Minister Evelyn Wever - Croes a ricibi invitacion di Mon Plaisir Basis School
pa forma parti di e apertura di e siman como parti di e tema di e aña aki cu ta: Bira locual cu bo kier bira, scoge e profesion cu bo kier.
Premier Wever - Croes ta felicita Mon Plaisir Basis School cu e iniciativa aki di invita diferente profesion pa e muchanan por mira di cerca kico e profesionnan ta. E apertura a tuma luga den forma di un parada den cual cu e diferente profesionnan a pasa den auto y tambe nan cana saluda e muchanan.
Sra. Debby Arends - Gietel Cabesante Mon Plaisir School: ‘Nos a habri e siman di festival di buki cu un parada den cuadro di e tema di e aña aki cu ta profesion: bira locual cu bo kier ora bo ta adulto.’
Sra. Arends - Gietel a splica cu e aña aki kier a kibra for di e tradicion di Polis, Ambulance, Brandweer y enbes di esaki kier a laga e muchanan wak hopi otro profesionnan cu nan por haci den futuro. Pa menciona algun di e profesionnan cu tabata presente ta Militar, doño di tienda, Setar, truk di chica pos y mucho mas. E cabesante a keda hopi agradeci cu Prome Minister tabata presente pa mustra e muchanan cu esaki tambe ta un opcion. The Sky is the Limit!
Premier Wever - Croes como Prome Minister di Pais Aruba hunto cu Colega Minister Endy Croes como Minister di Enseñansa y Deporte a keda sumamente contento di por a forma parti di e parada. Pa conclui Prome Minister a bisa: ‘Ohala cu awe por a inspira un mucha cu no sa ainda kico e kier bira den futuro pa e scoge su profesion di futuro. Pabien na Mon Plaisir Basis School cu e iniciativa bunita aki, hopi exito na tur scolnan e siman aki cu e siman di festival di buki pa mucha.’
