Ta boga pa entrega presupuesto di pais Aruba mas pronto posibel
ORANJESTAD (AAN): Colegio di supervision financiero di Aruba (CAft) ta na Aruba un biaha mas, unda cu dia 28 y 29 di October 2021 nan a haci diferente bishita.
Entre otro Caft a hiba combersaicon cu Gobernador, Minister di Finanzas y Cultura, Conseho di Minister, e Comision Parlamentario di Finanzas, Organisacion Gubernamental, Cultura y Deporte (CFOCS).
Banda di esey CAft a haci bishita na Banco Central di Aruba (CBA), Banco di Seguro Social (SVb) y Aruba Hotel and Tourism Association (AHATA). Prome cu e viahe di Colegio aki e presidente Raymond Gradus a haci un bishita na Parke Nacional Arikok. Na e ocasion ey a inform’e di e retonan di conservacion di naturalesa y e potencial economico di e parke aki pa turismo.
Durante un conferencia di prensa Diabierna atardi Gradus a indica cu Economia di Aruba ta recuperando bon. E cantidad di persona y di empresa cu ta recuri na e medidanan di sosten ta cada bes menos. P’esey Colegio di supervision financiero di Aruba (CAft) ta sali di e base cu e medidanan aki lo finalisa den e di cuater kwartaal di 2021.
Gradus a indica cu e ta contento di mira cu e recuperacion basa na gran parti riba turismo ta mas grandi cu locual a wordo calcula anteriormente.
E presidente a remarca si cu CAft no a ricibi ainda e proyecto di presupuesto di 2022.
El a splica cu e Gobiernonan di Aruba semper tabata tine mal custumber di entrega e presupuesto laat.
“Ta necesario pa Aruba tuma medida pa realisa un equilibrio presupuestario na 2022, pa den e añanan siguiente e por cuminsa paga e debe publico, cu ya tabata masha halto prome cu e crisis di e pandemia di COVID-19”.
CAft ta urgi gobierno pa elabora e proyecto di presupuesto mas pronto posibel, pa por aprob’e prome cu dia 15 di December di e aña aki, Gradus a indica.
El a sigui bisa cu segun Constitucion di Aruba, mester a presenta e proyecto di presupuesto di 2022 na Parlamento dia prome di September, pero cu te ainda esey no a sosode.
“ CAft ta enfatisa e importancia di aprobacion di un presupuesto na tempo”, segun Gradus.
E presidente a sigui bisa cu recuperacion di turismo y economia tambe ta mehora atrobe.
Aruba ta sali for di e punto di bista di un crecemento economico di 13,9% pa 2021 y den algun sector ya por ripara escasez di personal. P’esey CAft ta insisti pa pone fin na sosten salarial na termino mas cortico posibel. Tambe ta importante pa reclama mas pronto posibel e subsidionan di salario paga di mas.
Debe publico di Aruba aworaki ta monta na 5.600 miyon florin. Pa no laga e debe publico sigui aumenta, pa cuminsa, un equilibrio presupuestario pa aña presupuestario 2022 ta necesario. P’esey ta di importancia pa, ademas di stimula recuperacion economico, Gobierno nobo tuma tambe medida pa reduci gasto.
“E reformanan di e agenda di ehecusion mester contribui na mehoracion di finanzas publico y na reduccion di e debe publico”.
CAft ta urgi Gobierno pa inserta den e proyecto di presupuesto un planificacion di mas aña y pa haci transparente ta kico ta pretende di logra cu e reformanan, Gradus a indica.
