Investigacion di DIARIO a conduci na acusacionnan serio contra Gerentenan WEB - WEB casi a keda den cifra cora y gerencia lo no tabata sa cu tin placa pa drenta - Riesgonan financiero grandi a wordo forma pa e compania di awa y coriente
ORANJESTAD(AAN): Aruba no por confia cu e tin produccion di awa y coriente. Esaki ta uno di e motibonan cu ta haci cu retiro di dos gerente di WEB, Luis Oduber y Randolph Ruiz ta riba agenda pa e proximo reunion di accionistanan di WEB Aruba NV.
DIARIO a duna inicio na investigacionnan cu a duna como resultado un cantidad di acusacionnan directo cu mester conduci na e retiro di e dos miembronan di gerencia di WEB Aruba N.V.
Pa Aruba e informacionnan no ta nada alentador. E black-our di 3 di Juli 2021 a duna prueba cu Aruba no por confia riba su produccion di coriente.
E black-out tabata tin problemanan serio pa comercio di Aruba cu durante ultimo añanan a sufri como resultado di fayo di coriente. Pa e accionistanan esaki ta un indicacion serio di falta di un bon maneho y control di parti di Gerencia cu segun a wordo treci dilanti na DIARIO, tampoco parce di tin un bon bista riba e compania.
Informacionnan clave ta indica cu tin diferente punto cu accionistanan por aplica pa proba fayo den e maneho di WEB.
Informantenan ta indica cu tabata un prestamo, un asina yama “facility loan” cu tabata practicamente regla, ora el a wordo descontinua. Esaki lo tabata contra e interes di e compania productor di awa y coriente.
Lo por papia aki di un grado halto di falta di responsabilidad teniendo cuenta cu e debernan financiero di WEB Aruba NV. Aki sigur mester a tene na cuenta e proyecto Wartsila, Mester a tuma un accion cu menos resultado manera un areglo pa un prestamo adicional te na momento cu e facility loan lo a keda regla.
Aparentemente e gerentenan en cuestion tampoco a actua responsabel enfrente e asina yama proyecto Wartsila pa cual no tene destaho publico.
A pone un suma inicial di 75 Miyon Florin riba mesa for di reservanan propio, mientras e financiamente no tabata cla.
Esaki a resulta den riesgonan grandi debi cu WEB tabata den un problema financiero.
E riesgo aki por a mishi cu e personal pero tambe cu comunidad, cu lo por a keda sin garantia pa produccion di awa y coriente.
E ponencia aki, segun informacion di fuentenan bon na haltura, ta resulta den un carta di 2 di October 2019 di WEB na Utilities Aruba N.V., caminda a wordo splica cu WEB lo tabata den un situacion financiero critico debi cu el a mishi cu su reservanan. Hasta lo a wordo mustra cu WEB lo por a keda cu un saldo negativo.
Tres siman despues e situacion di WEB lo a scapa na man di un entrada inespera. Aki tambe ta wordo cuestiona con por tabata posibel cu gerencia di WEB no tabata na haltura cu e por a haya un entrada.
E forma cu a atende cu e facility loan, tambe ta un asunto serio den e confiansa cu tin pa e gerentenan di WEB, cu ta wordo acusa di a percura pa un retrazo importante pa e proyecto Wartsila, door di falta entre otro di lasser.
Informacionnan ta mustra cu tambe tabata tin problema cu entrega di presupuesto di WEB cu no a wordo presenta na tempo.
Un informacion di DIARIO cu a mustra algun tempo pasa cu e proyecto Eagle a wordo tranca na Aruba, a wordo confirma den e informacionnan cu awor ta mira luz y ta indica cu esaki tambe ta uno di e puntonan cu ta wordo presenta contra gerencia di WEB.
DIARIO lo sigui informa.
