E Arubiano humilde cu a wordo perhudica ayera, mester tin futuro awe - Mester atende e mannan invisibel di privilegiadonan di AVP cu urgencia - Parlamento mester deshaci di leynan cu ta haci politikeria elitario posibel
ORANJESTAD(AAN): Transparencia ta uno di e exigencianan di democracia. Ta pa motibo di transparencia, tur Miembro di Parlamento tin imunidad pa haci preguntanan necesario pa nan por traha na beneficio di Pueblo.
Ta pa motibo di transparencia, nada por keda scondi pa Pueblo cu asina ta mira realidad di su gobernacion y loke cada politico ta haci of laga di haci cu bienestar di Pueblo.
Tur cifra, tur accion, tur decision di un gobierno mester ta visibel pa Pueblo pa asina transparencia por produci integridad.
Despues di un periodo di gobernacion den cual Aruba mester a habri un caminda nobo pa su futuro, awor a yega e momento pa percura pa recuperacion, cu mester ta den cuadro di democracia pa e sirbi pueblo segun nos constitucion.
Pero democracia no por ta posibel mientras no deshaci completamente di e herencia di spiritonan cu ta e marca di e gobernacion di Mike Eman cum suis.
Mester cuminsa atende cu e mannan invisibel di privilegiadonan di AVP, cu ta trapa directamente riba democracia ora ta pretende cu ta hende cu estudio universitario so por sirbi e bienestar di e pais.
Historia di Aruba ta aplaudi e cantidad di Arubianonan cu den pasado y te awe den Gobierno, Parlamento y tur trabou di gobernacion a uza nan conocemento pa eleva Aruba.
Historia di Aruba na mes momento ta condena Arubiano y semi-Arubiano (pasobra Arubianismo ta mas cu un luga di nacemento), cu ta abusa di e hecho cu nan a haya oportunidad pa bay desaroya nan conocemento.
Awe tin hopi hende sabi den AVP cu mester splica Pueblo con nan a uza nan sabiduria pa na momento cu nan mes no ta presente, nan spiritonan intelectual por duna continuacion na loke nan kier haci.
Awe Pueblo di Aruba ainda ta studia e Rapport di Refineria, cu ta expone con Gobierno Mike Eman cu su spiritonan a haci y deshaci y con nan spiritonan a wordo privilegia den e compania di Estado, Refineria di Aruba.
Casonan den Corte a splica kico AVP a haci cu su sabiduria ora su spiritonan a actua den entre otro e caso Fondo Desaroyo Nobo San Nicolas pa asina spiritonan por a dera loke a wordo palabra dor di abogado di ministronan di AVP y Ministerio Publico na beach pa asina Mike su cara por tabata limpi ora e mester a bira Prome Ministro di AVP.
For di 2017 AVP no ta den gobierno di Aruba, pero su spiritonan si a keda atras. Spiritonan cu el a nombra den puestonan importante pa asina loke AVP ta desea sigui tuma luga, aunke Aruba y Arubianonan wordo perhudica.
Parlamento di Aruba awe tin un deber pa pone fin na spiritismo politico na Aruba dor di bini cu exigencia cu tur nombramento den puestonan importante ta wordo aproba dor di Parlamento tambe,
Awe Parlamento di Aruba tin un deber pa pone fin na e baile di spiritonan politico na puestonan importante na Aruba, dor di introduccion di leynan cu ta exigi mas supervision di Parlamento den tur loke ta propiedad di Pueblo.
Cu AVP lo trapa riba Ley tur hende ta na haltura pasobra entrada di Nicolas Maduro tabata sin aprobacion di Parlamento por ehempel. E forma cu spiritonan di Mike Eman a guia e uzo di placa di proyectonan Bo Aruba, tambe ta duna prueba di e maneho di spirito, cu awe mester termina pa asina transparencia cu ta base di democracia y ta garantia pa decencia y integridad bira realidad na Aruba cu no por sigui paga pa spirito politico!
