Democracia ta exigi cu e votador ta dicidi y disfruta di beneficio di compania di Estado - Proyecto cu mester baha prijs di awa pa Arubiano tambe pega den huma di WEB - Arubiano lo a wordo perhudica pa e forma cu a tranca negociacion pa awa mas barata
ORANJESTAD(AAN): Un bom cu por a spera a rementa!
Pa basta tempo DIARIO a mantene como punto di bista cu no ta posibel cu companianan vital di Pueblo, manera WEB Aruba NV, cu ta propiedad di Aruba, tinun gerencia cu por declara su mes independiente di e decisionnan cu ta wordo tuma dor di politiconan cu Pueblo ta entrega e maneho di e pais.
Na mes momento hopi bes DIARIO a adverti pa e hecho, cu partidonan politico ta nombra personanan di nan color den puestonan importante di companianan di Gobierno.
E rapport forensico di Refineria di Aruba, cu awor ta den man di Ministerio Publico, ta un prueba fuerte kico ta pasa si interes di Pueblo ta depende di personanan cu ta wordo nombra dor di politiconan y no ta wordo controla cu mes forsa cu personanan cu ta directamente den servicio di Gobierno.
Nos kier trece bon cla dilanti, cu aki nos no ta acusa ningun persona di buena fe cu ta traha na Compania di Gobierno ni ta den servicio publico. Pero nos mester ta honesto y mustra cu mester bini cambio den e situacion actual.
Companianan di Estado mester tene cuenta cu e maneho di Gobierno ora nan ta dicidi kico ta pasa den un compania y Parlamento na nomber di Pueblo mester vigila kico ta pasa den companianan di estado.
Pueblo di Aruba ta consisti di personanan cu ta depende di e maneho di su companianan pa entre otro e tin coriente den su cas pero tambe awa pa e bebe.
E dos elementonan aki ta basico tambe den gobernacion di un pais, cu ta bira realidad ora Pueblo acudi na urna electoral pa dicidi kende lo goberna e pais.
Un punto importante den e maneho di Prome Ministro Wever-Croes tabata e proyecto di Eagle LNG, cu mester a bira un realidad pa Aruba, cu lo a haya asina mas cupo di trabou, mas entrada pero na prome luga un prijs mas barata di awa y coriente.
Cuanto problema tabata tin entre Gobierno Wever-Croes y e gerencia di WEB pa WEB sinta na mesa cu Eagle LNG y negocia entrega di gas na WEB pa asina baha e prijs di coriente?
Ta increibel cu personanan cu ta gana salarionan enorme cu companianan cu ta di Pueblo, no por comprende kico ta nifica pa un persona cu mester paga pa productonan di WEB y no tin suficiente entrada.
DIARIO tin conexion importante cu diferente pais na mundo y nos a demostra esaki den informacionnan cu nos ta presenta. Ta base di e informacionnan aki DIARIO ta na haltura cu Eagle LNG, cu lo baha prijs di awa na Aruba, ainda ta en espera di negociacionnan na Aruba.
DIARIO no por a haya informacion pakico no a termina e negociacion pero awe DIARIO tin e informacionnan cu ta atende cu e retiro di dos dirigente di WEB N.V. cu tambe ta den problema cu e accionistanan di WEB pasobra nan lo no a trata di buena fe cu Eagle LNG.
Dia 25 di Juni 2021 Eagle LNG a manda un carta pa e Conseho di Comisarionan di WEB den cual nan ta indica cu prijsnan di Heavy Sulfer Fuel Oil ta sigui subi y cu por spera cu nan lo sigui subi durante temponan benidero.
Esaki ta haci cu e prijsnan di WEB lo keda halto loke lo afecta e Arubiano pober pero tambe ta stroba Aruba pa atrae inversionista.
Pa Aruba cu ta den un crisis financiero, esaki ta inaceptabel.
Ora DIARIO analisa kico a pasa aki y con un Compania di Estado tin poder pa dicidi riba alivio di condicion di bida di e Arubiano den un crisis historico mundial, awe mas cu nunca DIARIO ta yega na e conclusion cu tur nombramento den companianan di Gobierno mester bay pa medio di Parlamento y cu periodicamente Parlamento mester ricibi raportahe di companianan cu mester traha na bienestar di Pueblo!
Loke a pasa cu Eagle LNG, no tin nomber segun e sistema democratico.
