ORANJESTAD(AAN)—Falta algo mas cu un luna pa Aruba acudi na urna electoral pa dicidi kico e ta bay haci cu su futuro.
Aruba awe mester fungi como Huez y determina kico lo ta su destino durante e proximo periodo di gobernacion.
Pa evita cu loke a pasa Aruba na 2009, 2013 y ainda parcialmente na 2017 por ripiti, DIARIO lo presenta cifras pa evita cu e magia di bailarin di Mike destrui un parti mas grandi di historia di Aruba.
DIARIO a bolbe na 2017 y a cu bao nos brasa rapportnan di gobernacion di Mike Eman for di 2009 ora Aruba a cay den e trampa mas grandi di su historia politico.
Ora Evelyn Wever-Croes a haci su entrada na oficinanan di Gobierno di Aruba na 2017, el a topa cu propiedad di Pueblo di Aruba cu Mike Eman y su grupo a destrui.
Tristo con Gobierno Mike Eman a termina su obra y a destrui instalacionnan electrico di Aruba, a laga cashinan bashi sin documentonan cu mester a duna continuacion na gobernacion y hasta a lubida di kita nan marca pa medio di sticker y material sushi di propaganda di nan partido.
Placa Aruba mester a paga pa drecha loke nan a kibra intencionalmente mientras na mes momento mester a pidi tur cu a bay cu ekipo di Pueblo di Aruba, pa debolbe propiedad di e pais cu normalmente ta bisa ladron pa debolbe loke el a horta.
E loke gobierno Mike Eman a laga atras a haya su refleho den tur rapport financiero, economico, social, etc. di e pais. Rapportnan riba gobierno Mike Eman, ta manera un cadena di desaster pa Aruba loke e Presidente di e Comision di Supervision di Reino, tambe a trece dilanti na maart 2021.
Prof. Dr. R.H.J.M. Gradius, Presidente pues di CAFt, a mustra riba e falta di placa cu Aruba tabata tin for di 2000 pa cubri su gastonan. E ta mustra cu entre 2010 y 2014 e balansa entre e gastonan y entradanan di Aruba a bay mas halto cu nunca.
Esaki ta completamente di acuerdo cu loke DIARIO semper a informa Aruba ora DIARIO a mustra con Mike Eman a destrui Aruba ora el a baha BBO cu mita y asina intencionalmente hinca Aruba den debe cu Aruba mester paga.
Gradius ta mustra cu na 2011 y 2013 Aruba tabata por a pone e situacion financiero den balansa, pero e gastonan di Gobierno Eman tabata mucho halto.
Kico Gradius ta pensa di e proyectonan PPP, e Proyectonan pd Pueblo Paga despues di Mike Eman? E Presidente di CAFt a bisa cu e loke Mike a haci cu e fondo di Cien Miyon no ta “huicioso”.
Na 2015 CAFt a haci su entrada pa pone fin na e fiesta di Mike Eman. Pero ya tabata lat pasobra na 2014 ya 80 porciento di produccion di Arubianonan, tabata representa e cifra di e debe nacional cu Mike Eman a logra crea pa Aruba.
Na 2017, Evelyn Wever-Croes a bira Prome Ministro. Segun CAFt e cifranan cu Mike Eman a laga atras como calculacion pa 2017 no tabata sirbi pero tabata fantasia. Sigur un mal noticia pa Aruba, cu na 2017 despues di a baila y canta a tende, cu aventura di Citgo tambe a yega na su fin.
Cifranan di supervision Hulandes ta mustra cu Gobierno Mike Eman nunca a alcansa di produci un saldo positivo pa Aruba. Na 2017 hasta nan a calcula 200 Miyon mas cu nan lo a ricibi durante nan ultimo 12 lunanan den gobernacion.
Tabata Gobierno Evelyn Wever-Croes cu a percura pa trece balansa pa Aruba, manera Gradius ta mustra ora tambe e papia di e forma cu Gobierno Wever-Croes a sigui reglanan di instancia internacional, manera e Fondo Monetario Internacional, cu manera DIARIO tambe a trece dilanti tin elogio pa e trabou di Gobierno Wever-Croes.
