For di siman pasa, ora e partido di e lider di Bootcamp, Gilbert Webb a presenta su lista pa participa na eleccion,
DIARIO a saca tur su antenanan pa mira kico Gilbert tin na mente.
Cu DIARIO y Aruba ta uno den pensamento, sigur a bini dilanti den e cantidad di reaccionnan cu nos ta ricibi di Arubianonan, cu ta puntra nan mes kico ta bay pasa cu Parlamento di Aruba, cu mester defende interes di Aruba cu sin duda ta pasa den e pio momento di su historia politico na man di cierto figuranan.
Siman pasa a cera cu Aruba cu e peso di dos sospechoso oficialmente registra como candidato pa drenta Parlamento di un Pueblo, cu a lucha pa e por a yega na su autonomia y asina habri un futuro cu un estado di derecho merece.
Aparentemente Aruba no a tene na consideracion cuanto cayman por tin na boca di riu. Caymannan cu a subi tera y a encamina e prome pasonan pa asina trata di drenta Parlamento di Aruba.
Uno di e figuranan cu sigur DIARIO tabata tin na bista ta e persona di Gilbert Webb, cu for di basta dia mester a wordo investiga pa loke ta trata naturalesa di su Bootcamp y loke ta pasa cu muchanan di Aruba, cu di un of otro forma e y su grupo ta dicidi si nan mester biba den libertad of si nan mester ta den prizon a base di decision di nan mayornan cu tur hende tin derecho di cuestiona si tene na bista na cuanto ocasion mayornan mes ta destrui felicidad of bida di muchanan.
DIARIO a base di peticionnan cu a drenta mester a start un investigacion atrobe di loke ta pasa cu muchanan di Aruba a base di un Bootcamp, cu aparentemente por trapa riba tur instancia cu oficialmente Aruba a introduci pa asina vigila bienestar di muchanan.
Portretnan cu a wordo presenta na DIARIO a haci nos yora.
Kende lo kier mira un homber manera Gilbert sinta, mientras muchanan ta laba su pia?
Ora hende mira con e muchanan ta biba, kico nan ta come y con nan por wordo castiga dor di un grupo di cual ningun caminda nos por a mira nombernan di profesionalnan cu mester atende, nos ta puntra nos mes cu cual cara Gilbert ta kere cu e por drenta Parlamento di Aruba pa representa e Pueblo di Aruba.
DIARIO a bolbe na investigacionnan serio. DIARIO a catch e misil cu Gilbert a manda den Parlamento di Aruba, cu no mester di un forsa militar cu ta trapa riba Derecho di Muchanan pa gana placa, pa asina trece un cambio cu lo causa dolor na curason di mamanan cu no ta entrega nan yiu na abuso!
