Pianista Arubiano Jordy Zievinger a duna presentacion na Buenos Aires

Den e famoso ‘El Ateneo’ na Argentina

ORANJESTAD (AAN): Tabata riba e pagina social di un di su amigonan cu e conocido docente Addonsito Croes a topa cu algo particular y bunita.

   Tabata durante di su vakantie na Argentina cu e hoben pianista y studiante di musica na Scol di Musica Rufo Wever, Jordy Zievinger di 16 aña a dicidi di comparti cu un publico grandi un tiki di su talento riba piano.

   Hunto cu su famia e tabata di bishita na un di e bibliotecanan mas famoso na mundo cu ta “EL ATENEO” den centro di Buenos Aires. El Ateneo ta situa den un edificio teatral historico y ta declara pa National Geographic como e biblioteca mas bunita na mundo.

   E reaccion di e publico tabata un hopi bunita como cu hopi bishitante a puntra su famia di unda e ta bini y a brind’e su aplauso mereci. Tambe por a mira con hendenan tabata filma su presentacion como recuerdo. Su spontanidad y talento a keda aprecia. Aruba ta isla di talento.

   Cu e articulo aki, DIARIO hunto cu Addonsito Croes, ta desea di felicita Jordy cu su presentacion y nos ta sigur cu e ta un bon ehempel pa tur hoben y cu su famia y tur amigo ta orguyoso di dje. Tur exito di mundo pa Jordy, ta nos deseo.

   Jordy ta studiante di Colegio Arubano, y e potretnan aki ta pa cortesia di Javier Maduro.