Daryl Lue, Hefe di maneho di infrastructura:
*Actualmente ta inventariza tur scol na Aruba
ORANJESTAD (AAN) — Daryl Lue, Hefe di Maneho di Infrastructura na Departamento di Obranan Publico, den entrevista cu DIARIO a splica cu den e lapso ora cu scolnan cera pa vakantie y habri bek, enfoke di DOW ta pa drecha e areanan aki, segun lista di peticion.
Prome cu aña escolar cuminza nan a pinta tur e zebrapadnan rond pa haci nan mas visibel pa ora scol cuminza tur hende por wak e zebrapadnan mas cla.
Lue a bisa cu nan ta haci’e pa tur scol, nan ta handle cu tur stichting aunke cu enfasis esnan cu ta cay bao DPS (scolnan publico), pero e otro scolnan tambe, pero, el a reitera, a base di peticion. Cierto cosnan cu mester wordo drecha, nan ta cumpra e material anto DOW ta bin haci e trabao.
“Actualmente nos ta ocupa cu full un inventarizacion di tur scol na Aruba, conhuntamente cu e minister encarga, pa wak con e grandura di scol ta y tambe den ki estado e ta. P’esey nos tin e den advisor aworaki tambe, pa nos wak con por sigui bay dilanti, y wak den ki condicion e scolnan ta, p’asina ey nos por prioriza y kico e advisor tambe ta bisa y probablemente cerca stichting pa wak kico tur ta e pasonan cu mester tuma”, Daryl Lue a indica.
E fondonan ta bin conhuntamente cu e ministerio y e stichtingnan pa yega na algo pa mehora e estado di e scolnan”, Hefe di Infrastructura di DOW a splica.
