Entrante 1 di Augustus
ORANJESTAD (AAN): Manera a wordo anuncia caba, entrante 1 di October lo tin un cambio encuanto e lista positivo di remedi cu aworaki ta cubri pa AZV. Minister Dangui Oduber a splica, den conferencia di prensa.
E lista positivo ta algo cu AZV a inclui den su “Five Way Model” tocante e remedinan cu ta bay den reki, por ehemplo Paracetamol, cu e asegurado mes lo mester cubri.
Minister Oduber a splica cu ora e asegurado cumpra e remedi aki di su mes, e ta paga entre dos pa tres florin, pero ora AZV cubri esaki na botica, e ta paga casi 16 florin. Esaki ta e acuerdo cu tin den e “receptregelvergoeding”, y akinan a wordo identifica algun miyon florin di spaarmento pa AZV.
E dignatario a toca un punto hopi interesante, y esaki tin di haber cu e remedinan cu personanan cu tin malesa cronico (of cancer), lo mantene na tur momento acceso na nan remedinan, pero nan mester haya verwijsbrief di nan specialista pa e remedinan cu nan malesa y nan ta wordo cubri. E minister a reitera cu a percura pa e pashentnan cu tin malesa cronico y tin necesidad di keda uza nan remedinan, haya esaki pa medio di e verwijsbrief cu mester haya di nan specialista. Esaki lo drenta na vigor entrante 1 di Augustus. Esaki a wordo traha na 2020 caba den e “five way model” di AZV y a wordo comparti cu Parlamento caba.
