ORANJESTAD (AAN): Dia 24 di Juli ta un fecha unda den e Paisnan Bolivariano ta conmemora e fecha natal di Libertador Simon Bolivar,
pero ademas, desde 1993 e Asociacion Latinoamericano di Integracion (ALADI), a elegi e fecha aki pa celebra e Dia di Integracion di e Paisnan di America Latina y Caribe.
Un residente Venezolano a tuma contacto cu DIARIO, pa trece dilanti un relato cortico, y alavez pa manda un saludo pa tur e Latinoamericanonan biba na Aruba y tambe e pueblo Arubano, y expresa su deseonan di union genuino entre e diferente nacionalidadnan cu, pa un of otro motibo, a scoge pa e Isla bendiciona aki bira nan cas.
E residente aki, di fam Bejarano, a conta cu e idea di Integracion di Paisnan di America Latina y Caribe (den cual mester conta Aruba tambe), ta pasobra e region aki tin hopi semehanza den cultura como tambe den aspectonan politico y social, economico, religioso, linguistico, ideologico y geografico, tin e meta di fortifica e democracianan, e identidad cultural y huridico di Latinoamerica y Caribe, fomenta e crecemento economico mutualmente, mantene e paz, y fortalece e negociacionnan internacional, desaroyo humano, y crea un comunidad Latinoamericano y Caribense, fuerte.
Pa ultimo el a expresa palabranan di danki na Pais Aruba, cu semper a acoge bao su bandera hopi ciudadano procedente di paisnan Latinoamericano, cu a genera un generacion latino-arubano, y cu ta stima Aruba como nan di dos patria.
