ORANJESTAD (AAN): Recientemente Parlamentario Evelyn Wever-Croes a reuni cu representantenan di San Nicolas Business Association.
Wever-Croes a expresa cu e reunion tabata uno hopi positivo na unda e asociacion a entrega su persona un documento cu nan vision pa desaroyo di San Nicolas.
Segun e parlamentario, e vision di e asociacion aki ta uno integral y holistico cu si wordo realisa por trece hopi desaroyo, progreso y bienestar pa e pueblo di San Nicolas y pa e pueblo di Aruba.
Tambe, San Nicolas Business Association a indica cu nan a entrega e mesun vision aki na Gobierno, y ta pendiente di un contesta di nan. Pa loke ta Parlamento, Parlamentario Wever-Croes a indica cu e lo propone na presidente di parlamento pa institui un comision special di Parlamento pa atende cu desaroyo di San Nicolas pa asina tin atencion constante pa e desaroyonan aki.
