Campaña di FUNARI ‘Strea di Spweransa’ pa recuada fondo

Donacionnan ta fundamental pa FUNARI sigui promove inclusion y mas

ORANJESTAD (AAN): Pa mas di 40 aña, Fundacion Arubano pa Invalidonan, FUNARI Aruba, ta cambiando bida di ciudadanonan cu un of otro limitacion fisico. FUNARI ta un organisacion no gubernamental cu ta dedica esfuersonan pa empodera hende cu limitacion fisico, via inclusion social, actividadnan y sosten di comunidad. FUNARI desde su fundacion na 1979, a bira un instituto social importante na unda ciudadanonan di tur edad y habilidad por conecta, desaroya y haya bek su independencia.

   E subsidio cu FUNARI ta haya pa cumpli cu nan vision y mision no ta alcansa pa logra tur loke cu nan kier pa empodera y mehora e calidad di bida di e grupo aki den nos sociedad. Por lo tanto, donacionnan ta fundamental pa FUNARI sigui promove inclusion y autosuficiencia pa nos ciudadanonan aki.

   Coordinado di FUNARI, señora Brenda Rasmijn a anuncia e campaña cu FUNARI ta lansa e aña aki pa recauda fondo pa asina e fundacion por sigui brinda servicio den aña 2026. E campaña ta hiba como titulo: ‘Strea di Speransa’ na unda cu ciudadanonan ta ser pidi pa ‘Golga un strea di speransa na FUNARI’. E clientenan di FUNARI mes ta traha e streanan aki.

   Señora Rasmijn ta splica cu por haci donacion den diferente montante segun e strea cu bo scoge. Tin strea di 25 Florin, 50 Florin, 75 Florin, 100 Florin, y 200 Florin.  Cu e accion aki, FUNARI su meta ta pa yega e prome 10 mil florin, pero lo ta ideal pa recauda mas placa pa asina cubri mas gasto especialmente transporte, na unda cu mantencion di bus y auto special ta un gasto halto.

   “Cu boso donacion nos por amplia nos servicio den 2026. Haci bo donacion, golga bo Strea di Speransa sea na FUNARI, bo cas of den bo auto y briya hunto cu FUNARI”, señora Rasmijn a expresa.

   Como inicio di e campaña Strea di Speransa, señora Rasmijn a golga e prome strea na FUNARI y a haci un transferencia di biaha tambe riba e cuenta bancario di FUNARI como e prome donacion. Pa mas informacion, por tuma contacto cu FUNARI.