ORANJESTAD (AAN): Un noticia tristo pa su cliente- y amigonan kendenan pa hopi aña a prefera di viaha pa Colombia y
otro paisnan den region, incluyendo Merca y Europa.
E agencia JASABA cu nifica ‘Jaime Salcedo Barraza’, a wordo funda door di Jaime Salcedo na Juni 1993 pero a habri su portanan como Agencia di Viahe na Februari 1994, representando aerolineanan manera Avianca, SAM, Aerorepublica, Aires, Avensa, Aeropostal,Venezolana, Aserca y hopi aerolinea mas cualnan tabata existi e tempo ey.
Ta un lastima cu e agencia a cera, debi na problemanan cu a start for di tempo di Pandemia di Covid-19 na 2020, y cu a cuminza haci impacto negativo riba companianan di transporte aereo, nan agentenan di viahe, y economia en general, ademas di e crecimento di benta Online di pasashi.
Semper tabata agradabel pa bishita e oficina di señor Jaime, mientras cu su secretarianan, specialmente Alexandra, tabata e prepara e pasashinan, señor Jaime Salcedo tabata prepara un dushi coffie Colombiano cu hopi cortesia y atencion pa su clientenan.
Debi na algun problema di salud, señor Jaime a dicidi na cera awor definitivamente su oficina stima. Semper e tin un DIARIO benta riba su lessenaar, y awor via di e corant di Aruba, e kier a duna hopi gradicimento na tur su cliente- y amigonan pa e yudanza direct y cordial cu a dune pa mantene e Agencia activo pa mas di 30 aña di servicio continuo. “Mi tin boso tur den mi curazon, amigonan stima,” el a declara. Na final el a bisa: “Danki Aruba, nos isla feliz. Danki semper.”
