Pa prome biaha e historia y cultura di Suriname tabata riba escenario na Aruba

ORANJESTAD (AAN): E musica, historia, y cultura di Suriname a presenta den un espectaculo multicultural cu a ser teni den Cas di Cultura na Aruba,

na nomber di Unesco.  Esaki a socede weekend cu a pasa, riba e dia cu Unesco a proclama como “Dia Internacional di Diversidad Cultural”.

   Pa e evento aki, e Departamento di Enseñanza di Aruba a invita varios grupo etnico na Aruba pa duna show na publico, pa mustra e identidad y cultura di nan pais of grupo etnico via di artenan expresivo manera baile, teatro, y poesia.  Tur esaki a wordo graba pa keda manda pa Unesco.  Na esaki un total di 25 grupo a participa.

   Cu hopi entusiasmo, Fabricio Kartidikromo Wever, un hoben Surinameño cu ta biba na Aruba pa 2 aña caba cu su pareha, y cu no ta un desconoci pa e escena artistico, a duna Ok mesora na e peticion haci na dje pa e keda encarga cu e produccion Surinameño.  Esaki ta prome biaha cu Suriname a wordo representa den e tipo di eventonan aki na Aruba.

   Fabricio Kartidikromo Wever ta conoci pa su amigonan como ‘Fabi’, y e mes hunto cu su socionan ta artistanan ‘emergente’ cu ta haci arte visual haciendo uso di material PVC.

   Fabi tambe hopi biaha ta sinta dilanti machine di cose y su talento den moda por wordo mira tambe na e bistirnan tradicional cu e mes a traha pa e show.  Cada grupo etnico di poblacion di Suriname, esta e Creol, Indigeno, Javanes, Hindu, y Marron, a wordo representa riba bistirnan di esnan riba escenario.

   E show di 5-minuut di Fabi, cu a wordo yama “Cultura no e dede”, a consisti di teatro di sombra cu a touch brevemente pasado di sclavitud di Suriname, cu e conocido cancion cu a pas pa e tema, ‘Faya Siton”, y un escena hororoso unda un Doño ta maltrata un Esclavo dilanti varios esclavo desespera y yorando cu tabata mira esey.  Despues e cadena cu tabatin e esclavo wanta a kibra.  Den coro nan tabata canta ‘Lolo mi boto”, y cu movimentonan di rema, e actornan a sali for di patras di e telon.  Esaki a simboliza e viahe di e esclavonan, cu ta representa 1 di e 5 grupo di poblacion di Suriname, rumbo pa ‘libertad’.

   Despues di a nota cu sclavitud ya ta forma parti di historia y cu e abolicion porfin a socede, nan a expresa nan alegria y celebracion.  Aki claro no por a falta e baile y a start cu un fiesta grandi ora cu e muher Creool a grita:  “Baaas dan harr mi wang poku dan.”

   Esaki tabata e momento cu e grupo a invita Ministro di Cultura Xiomara Maduro pa subi stage y celebra cu e Surinameñonan, pa asina Ministro por sinti e calor, e amor, y e union di e pueblo.  Como muestra di agradecimento cu Aruba a ricibi Surinameñonan cu braza habri, y keto bay ta haciendo esey, Fabi a haci entrega na Ministro un regalo Anyisa traha pe mes.

   Den e contexto aki, e Anyisa tambe ta un simbolo di e continuo relacion respetuoso entre e dos paisnan.

   Pa conclui, nan a splica brevemente na Ministro y na publico, riba e importancia y e uso di Anyisa, cu ta un di e Patrimonionan Inmaterial di Suriname pa Unesco.

   Publico a keda entusiasma cu e actuacion riba stage, y Ministro tambe a expresa su gradicimento na Suriname riba su pagina di Facebook pa e regalo y di por a participa den e celebracion.  Ministro a hasta bisti e Anyisa.

   Fabi cu su grupo di teatro ta hopi contento cu e feedback positivo cu nan a ricibi, y lo sigui representa Suriname tanto na e pais y den exterior.  Tambe nan lo spera di por hiba e produccion aki pa Suriname lo mas pronto posible.  E meta ta pa na final bin cu un cooperacion interno na e pais riba tereno di arte y cultura entre Aruba y Suriname.