HAVA ta alerta comunidad: - ORANJESTAD (AAN) – Presidente di Asociacion di Docternan di Cas, docter Juaquin van Trigt, a emiti un comunicado pa nos comunidad, den cual e ta declara lo siguiente:
“Nos como docternan di cas (HAVA) kier pidi boso atencion pa e situacion critico cu boso lo ta enfrentando dentro di poco tempo, y ya ta mustrando su prome efectonan. Practicanan di docternan di cas tin retonan grandi pa añanan caba pa mantene cuido na un nivel aceptabel pa nan pashentnan door di falta di inversion y adaptacion di e budget di huisartsenzorg (prome linea di cuido). E ultimo contract firma cu AZV ya caba ta di 2013 y gastonan operacional a sigui subi door di inflacion, costo di material y personal y exigencianan den servicio di calidad stipula door di AZV. Esaki ta nifica cu pa par di aña caba practicanan di docter di cas no por cubri nan gastonan eficientemente, cu resultado di tin budget net riba rand di balans of negativo.
Docternan di cas no por ni permiti nan mes un pensioen of seguro di incapacidad (arbeidsongeschiktheidsverzekering) locual ta un derecho pa tur empleado medico. Actualmente tin 46 dokter di cas na Aruba pa 107.576 asegurado di AZV. Esaki ta resulta den praktijknan cu un promedio di 2.350 pashient pa cada docter di cas. Un cantidad cu awendia no ta manehable mas, locual ta pone hopi presion riba e servicio y disponibilidad di e oficinanan creando un domino-effect riba e cadena di cuido cu pashentnan atendiendo na Eerste Hulp di Hospital y IMSAN innecesariamente (na Hulanda e promedio actual ta 2.095 y tin hopi praktijknan cu cantidad mas abou). Esaki ta crea ineficiencia den e structura di cuido cu gastonan mas halto pa AZV y Salubridad Publico.
Door di e pandemia di COVID-19 AZV riba instruccion di gobierno a dicidi di corta 5% riba e budget di tur dunadornan di cuido. For di principio di solidaridad, HAVA y su miembronan a dicidi di no bay den protesta y a tuma un recorte di 4.125% riba e budget di e praktijknan. Nos kier enfatisa cu budget no ta igual na entrada di docternan di cas. E gastonan di personal, utilidadnan y huur/hipoteca y material por ehempel no a baha. Esaki ta nifica cu e budget cu ya caba pa añanan tabata hopi krap a pone praktijknan bai den situacion critico. Esaki a pone cu docternan di cas a dicidi di corta den nan servicio ya cu no por a corta den gastonan operacional. AZV a lanta un caso sumario contra docternan di cas pa esaki y e docternan di cas lamentablemente a perde nan caso contra AZV.
Actualmente nos situacion financiero no a cambia. Door di e situacion precario, locual cu nos a premira, y a alerta AZV y gobierno riba dje aña pasa ta birando realidad. Pa September 2021 lo tin 12.500-15.000 patient cu lo keda sin dokter di cas door cu 5 praktijknan di dokter di cas lo bay sera nan porta. Nos a sondea den nos seno y tin mas colega cu lo tuma e decision dificil mirando cu e situacion no lo cambia por lo pronto. Pa e motibo aki nos kier bati alarma na pueblo pa e situacion alarmante cu ta wordo crea actualmente y ta urgi AZV y gobierno pa tuma e pasonan necesario pa yega na un solucion prome cu te mucho laat y daño ireparable a wordo hasi na salud di e ciudadanonan y structura di Salud Publico en general” Docter Van Trigt, presidente di HAVA, ta conclui.
NOTA DI REDACCION: Director di AZV a duna un conferencia di prensa Diahuebs despues di merdia, pa aclarea un ke otro di loke HAVA a trece dilanti pa pueblo.
